ડીસા નગરપાલિકા દ્વારા ઉત્તર ગુજરાત વીજ કંપની લિમિટેડના રૂ. 8.83 કરોડના બાકી લેણાં અંગે વારંવાર નોટિસો આપવા છતાં, UGVCLએ પાલિકાના ચીફ ઓફિસરને 72 કલાકની અંતિમ નોટિસ પાઠવી હતી. જો નાણા ચૂકવવામાં નહીં આવે તો પાલિકાએ 37 બોર સહિતના વીજ જોડાણ કાપી નાખવાની ચીમકી ઉચ્ચારી છે. ડીસા નગરપાલિકા પાસે શહેરમાં પાણી પહોંચાડવા માટે વોટર વર્કસ વિભાગના 37 બોર છે. જેના કારણે દર મહિને વીજ બિલ 40 લાખ રૂપિયાથી વધુ આવવાનો અંદાજ છે. તેમ છતાં છેલ્લા ઘણા સમયથી ઉત્તર ગુજરાત વીજ કંપની લિમિટેડ ડીસા નગરપાલિકા દ્વારા વીજ બીલ ન ભરવા અંગે ડીસા નગરપાલિકાના ચીફ ઓફિસરને નોટીસ પાઠવી રહી છે. નગરપાલિકા દ્વારા લાંબા સમયથી વીજ બિલની ચૂકવણી કરવામાં આવી નથી અને બાકી વીજ બિલનો આંકડો હવે 8.83 કરોડ પર પહોંચ્યો છે.
ત્યારે UGVCLએ ડીસા શહેર સબ ડિવિઝનના ડેપ્યુટી એન્જિનિયર મારફત ડીસા નગરપાલિકાના ચીફ ઓફિસરને અંતિમ નોટિસ મોકલીને 72 કલાકમાં વીજ બિલ ચૂકવવા જણાવ્યું છે. જો નગરપાલિકા દ્વારા આ વીજ બિલ ભરવામાં નહીં આવે તો વીજ કંપનીએ ડીસા નગરપાલિકાની મુખ્ય કચેરી અને હાટીખાના સ્ટોર વિભાગના વીજ જોડાણ સિવાયના તમામ 37 પાણીના બોરના વીજ જોડાણો કાપી નાખવાની ચીમકી ઉચ્ચારી છે. તેમજ જો આ વીજ કનેકશન કપાશે તો શહેરીજનોને ભારે હાલાકીનો સામનો કરવો પડશે અને તેની સંપૂર્ણ જવાબદારી ડીસા નગરપાલિકાની રહેશે તેમ પણ નોટીસમાં જણાવાયું છે. આ અંગે પાલિકાના ચીફ ઓફિસર પંકજ બારોટે જણાવ્યું હતું કે, પાલિકા દર મહિને સમયસર વીજ બિલ ભરે છે અને આ બાબતે હું અધિકારી સાથે ચર્ચા કરું છું. યુજીવીસીએલના અધિકારીઓ આ બાબતની માહિતી મારી સમક્ષ મીડિયાને આપે તે પણ યોગ્ય નથી.