ડીસા નગરપાલિકાના વોર્ડ નંબર નવમાં સભ્યના રાજીનામાથી ખાલી પડેલી બેઠક પર પેટાચૂંટણી યોજાવા જઈ રહી છે. ત્યારે આજે સાંજે પ્રચારનો ઘોંઘાટ શમી જતાં ઉમેદવારોએ ઘરે-ઘરે જઈને મતદારોને મળવાનું શરૂ કરી દીધું છે. ડીસા નગરપાલિકાના વોર્ડ નં.9ની એક બેઠક માટેની પેટા ચૂંટણીમાં ત્રણ ઉમેદવારો મેદાનમાં છે. ભાજપના ઉમેદવાર તરીકે કાંતિલાલ લોઢા, કોંગ્રેસના ઉમેદવાર તરીકે ઈમરાન કુરેશી અને આમ આદમી પાર્ટીના ઉમેદવાર તરીકે જીજ્ઞેશ દેસાઈ મેદાનમાં છે. છેલ્લા ઘણા દિવસોથી ભાજપ, કોંગ્રેસ અને આમ આદમી પાર્ટીના નેતાઓએ વિસ્તારોમાં પોતાના ઉમેદવારોને જીતાડવા માટે જોરદાર પ્રચાર કર્યો હતો. બીજી તરફ ચૂંટણી પ્રચારના છેલ્લા દિવસે આજે ભાજપના ચૂંટણી કાર્યાલયનું ઉદ્ઘાટન કરવામાં આવ્યું હતું. ચૂંટણી પ્રચારના છેલ્લા દિવસે આમ આદમી પાર્ટીએ પણ વોર્ડમાં રેલી કાઢી હતી. કોંગ્રેસના ઉમેદવારે પણ તેમના સમર્થકો સાથે વિવિધ વિસ્તારોમાં પ્રચાર કર્યો હતો. આજે પ્રચાર શાંત થયા બાદ હવે ત્રણેય ઉમેદવારો છુપી રીતે મતદારોને રીઝવવામાં વ્યસ્ત છે. વોર્ડ નં.9ની પેટાચૂંટણી 6 ઓગસ્ટે કુલ પાંચ મતદાન મથકો પર યોજાશે. 8મી ઓગસ્ટે મતગણતરી હાથ ધરાશે.