ડીસામાં ગઈકાલે દિવસભર ભારે ગરમી અને પવન બાદ મોડી સાંજે વાતાવરણમાં પલટો આવ્યો હતો અને જોરદાર પવન સાથે વાવાઝોડાની શરૂઆત થઈ હતી. ભારે પવનના કારણે અનેક વિસ્તારોમાં ધૂળની ડમરીઓ ઉડતાં ટુ-વ્હીલર ચાલકોને ભારે હાલાકીનો સામનો કરવો પડ્યો હતો. વાવાઝોડામાં દુકાનના પડદા અને ખુરશીઓ પણ રસ્તા પર ઉડવા લાગી હતી. અવારનવાર વાવાઝોડાના કારણે ઘરોમાં પ્રવેશતી ધૂળથી મહિલાઓ પણ કંટાળી ગઈ હતી.
જ્યારે ડીસા તાલુકાના કાંટ, રસાણા સહિતના અનેક ગામોમાં ગાજવીજ અને વીજળીના કડાકા-ભડાકા થયા હતા. સતત અડધો કલાક સુધી મુશળધાર વરસાદથી જળબંબાકારની સ્થિતિ સર્જાઈ હતી. જેથી ખેડૂતોને પણ નુકશાની વેઠવી પડી છે. ડીસા પંથકમાં છેલ્લા 15 દિવસથી સતત ગાજવીજ અને વરસાદ પડી રહ્યો છે જેના કારણે જનજીવન પ્રભાવિત થયું છે અને ખાસ કરીને ખેડૂતો અને પશુપાલકોને વધુ નુકસાન થયું છે.