તિબેટ (શિજાંગ) ના નાગચુ શહેરની બેચેન કાઉન્ટીમાં આવેલા 7.0 તીવ્રતાના ભૂકંપને કારણે ઓછામાં ઓછા 16 લોકોના મોત થયા છે અને 76 લોકો ઘાયલ થયા છે, જ્યારે 339 મકાનોને નુકસાન થયાના અહેવાલો છે. ભૂકંપના કારણે સર્જાયેલી આ જબરદસ્ત તબાહી બાદ રાહત અને બચાવ ટુકડીઓએ અસરગ્રસ્ત વિસ્તારમાં ઈમરજન્સી શોધ, ઈજાગ્રસ્તોની સારવાર અને ચોવીસ કલાક રાહત કામગીરી હાથ ધરી છે, જ્યાં રાહત સામગ્રી સતત પહોંચાડવામાં આવી રહી છે.
સ્થાનિક અધિકારીઓએ શુક્રવારે બપોરે જણાવ્યું હતું કે ગુરુવારે રાત્રે સ્થાનિક સમય પ્રમાણે 10:33 વાગ્યે બેચેનમાં આવેલા ભૂકંપને કારણે શુક્રવારે બપોરે 13:00 વાગ્યા સુધીમાં 16 લોકોના મોત થયા છે અને 76 લોકો ઘાયલ થયા છે. આ સિવાય 339 મકાનોને નુકસાન થયું છે. મીડિયા અહેવાલો અનુસાર, સ્થાનિક ફાયર અને બચાવ ટીમના આઠ બચાવ કર્મચારીઓની એક એડવાન્સ ટુકડી આજે સવારે 2:10 વાગ્યે અસરગ્રસ્ત વિસ્તારમાં પહોંચી હતી અને કાટમાળ નીચે ફસાયેલા એક વ્યક્તિને સુરક્ષિત રીતે બહાર કાઢ્યો હતો.
મોડી રાત્રે આદેશ મળ્યા બાદ, શિજાંગ મિલિટરી કમાન્ડ અને પીપલ્સ સશસ્ત્ર પોલીસ દળના શિજાંગ કોર્પ્સે તાત્કાલિક આપત્તિ રાહત માટે તેમનું કટોકટી આયોજન શરૂ કર્યું. રાત્રે જ, 20 થી વધુ વાહનોમાં 300 થી વધુ સૈનિકો મોટરવાળી ટુકડીઓમાં ભૂકંપ પ્રભાવિત વિસ્તાર માટે રવાના થયા હતા. વેસ્ટર્ન થિયેટર કમાન્ડ એરફોર્સના એક યુનિટે શુક્રવારે મધ્યરાત્રિની આસપાસ એક માનવરહિત ડ્રોન તૈનાત કર્યું હતું, જેણે અસરગ્રસ્ત વિસ્તારનું હવાઈ સર્વેક્ષણ કર્યું હતું અને કાટમાળ અને વિનાશના જીવંત ફૂટેજ મોકલ્યા હતા. વહીવટીતંત્ર દ્વારા વિવિધ સ્તરે ફાળવવામાં આવેલી રાહત સામગ્રી શુક્રવારે સવારથી ભૂકંપ પ્રભાવિત વિસ્તારમાં પહોંચવાનું શરૂ કરી દીધું છે. તેમાં 1,000 તૈયાર મકાનો, 3,200 થી વધુ ટેન્ટ, 2,800 થી વધુ ફોલ્ડિંગ બેડ અને રજાઈ, સ્ટવ અને કપડાં જેવી આવશ્યક દૈનિક વસ્તુઓનો સમાવેશ થાય છે.
શિજાંગ ઓટોનોમસ રિજનના ઈમરજન્સી કમાન્ડે તમામ સ્તરે અને સંબંધિત વિભાગોના અધિકારીઓને બચી ગયેલાઓની શોધ અને બચાવ કરવા, ઘાયલોની સારવાર કરવા અને અસરગ્રસ્ત રહેવાસીઓને સુરક્ષિત સ્થાનો પર ખસેડવા સૂચના આપી છે. જાહેર સુરક્ષા, ફાયર સર્વિસ, સ્ટેટ ગ્રીડ અને પરિવહન કર્મચારીઓ સહિત બચાવ અને રાહત ટીમો એપીસેન્ટર તરફ આગળ વધી રહી છે. મીડિયા રિપોર્ટ્સ અનુસાર, ભૂકંપનું કેન્દ્ર બેચેન કાઉન્ટીથી 59 કિલોમીટર દૂર હતું. ભૂકંપના કેન્દ્રની આસપાસનો વિસ્તાર સરેરાશ 4,800 મીટરની ઉંચાઈ પર સ્થિત છે, જ્યાં વસ્તી ઘણી ઓછી છે.
ચીનના નાણા મંત્રાલય અને ઇમરજન્સી મેનેજમેન્ટ મંત્રાલયે રાહત પ્રયાસો અને અસરગ્રસ્ત રહેવાસીઓને ટેકો આપવા માટે 50 મિલિયન યુઆન ($7.44 મિલિયન)નું કેન્દ્રીય આપત્તિ રાહત ભંડોળ ફાળવ્યું છે. આ ઉપરાંત, રાષ્ટ્રીય વિકાસ અને સુધાર આયોગે પણ માળખાકીય સુવિધાઓ અને જાહેર સુવિધાઓના સમારકામ માટે 30 મિલિયન યુઆનની નાણાકીય સહાયને મંજૂરી આપી છે.
