ગુજરાત સરકારના વિજ્ઞાન અને ટેકનોલોજી વિભાગના નેજા હેઠળ ગુજકોસ્ટ દ્વારા સ્થાપિત પ્રાદેશિક વિજ્ઞાન કેન્દ્ર પાટણ ખાતે આજે 1લી ફેબ્રુઆરી 2024ના રોજ ભારતીય તટ રક્ષક દિવસની ઉજવણીમાં રસાયણશાસ્ત્રના રંગો પર વર્કશોપ અને ક્વિઝ અને સાયન્ટિફિક-શોનું આયોજન કરવામાં આવ્યું હતું. જેમાં 250 થી વધુ વિદ્યાર્થીઓ, શિક્ષકો અને જનતાએ ભાગ લીધો હતો. એક નિષ્ણાત માર્ગદર્શિકાએ રસાયણશાસ્ત્રના વિવિધ તત્વો અને તેના ઉપયોગોને એક ઇન્ટરેક્ટિવ મોડલ દ્વારા સહભાગીઓને દર્શાવ્યા.
ત્યારબાદ વિજ્ઞાન કેન્દ્રના પ્રોજેક્ટ ડાયરેક્ટર ડો. સુમિત શાસ્ત્રીએ કહ્યું કે ભારતીય કોસ્ટ ગાર્ડ દિવસ દરિયાઈ સુરક્ષા માટે જવાબદાર કોસ્ટ ગાર્ડ અને તેના કર્મચારીઓના યોગદાનને માન આપવા માટે ઉજવવામાં આવે છે. તેમણે વધુમાં જણાવ્યું હતું કે, ફેબ્રુઆરી માસ દરમિયાન વિજ્ઞાન કેન્દ્ર ખાતે એક મહિના સુધી રાષ્ટ્રીય વિજ્ઞાન દિવસની ઉજવણીનું આયોજન કરવામાં આવશે. જેમાં વિજ્ઞાનને લગતી વિવિધ પ્રવૃત્તિઓનું આયોજન કરવામાં આવશે.