સર્ચ ઓપરેશન દરમિયાન ગુજરાતના પોરબંદરના દરિયામાંથી 6 પાકિસ્તાની ઝડપાયા છે. ગુજરાત ATS, ભારતીય કોસ્ટ ગાર્ડ અને NCBના સંયુક્ત ઓપરેશનમાં આ 6 પાકિસ્તાનીઓની ધરપકડ કરવામાં આવી છે. આ સમયગાળા દરમિયાન તેમની પાસેથી 480 કરોડ રૂપિયાનું ડ્રગ્સ જપ્ત કરવામાં આવ્યું હતું. આ પકડાયેલા પાકિસ્તાનીઓને પોરબંદર લાવવામાં આવશે. કોસ્ટ ગાર્ડ, એટીએસ અને એનસીબીએ મળીને અત્યાર સુધીમાં 3,135 કરોડ રૂપિયાનું ડ્રગ્સ જપ્ત કર્યું છે.
પોરબંદર નજીક અરબી સમુદ્રમાંથી ફરી એકવાર ડ્રગ્સ ઝડપાયું છે. ગુજરાત ATS, કોસ્ટગાર્ડ અને NCBએ સંયુક્ત ઓપરેશન હાથ ધર્યું હતું. પોરબંદરથી 350 કિલોમીટર દૂર પાણીમાંથી ડ્રગ્સનો મોટો જથ્થો ઝડપાયો હતો. આ સંયુક્ત ઓપરેશનમાં 480 કરોડ રૂપિયાનું ડ્રગ્સ જપ્ત કરવામાં આવ્યું છે. ઓપરેશન દરમિયાન 70 થી 80 ડ્રગ પેકેટ સાથે 6 પાકિસ્તાની ઝડપાયા હતા. પ્રાપ્ત માહિતી અનુસાર પકડાયેલા તમામ આરોપીઓને પોરબંદર લાવવામાં આવશે.
એજન્સીઓ પાસેથી મળેલી ચોક્કસ માહિતીના આધારે ભારતીય કોસ્ટ ગાર્ડે સોમવારે 11 માર્ચે અરબી સમુદ્રમાં ઓપરેશન હાથ ધર્યું હતું. એક સંયુક્ત ઓપરેશનમાં, ઈન્ડિયન કોસ્ટ ગાર્ડ (ICG) એ ગુપ્ત માહિતીના આધારે પાકિસ્તાની બોટને 6 ક્રૂ અને નાર્કોટિક્સ સાથે અટકાવી હતી. ICG એ સંભવિત વિસ્તારોમાં બોટને સ્કેન કરવા અને શોધવા માટે તેના ડોર્નિયર એરક્રાફ્ટને તૈનાત કર્યા. શોધખોળ બાદ NCB અને ATS ગુજરાતની ટીમો સાથે ICG જહાજો ઘટનાસ્થળે પહોંચી ગયા હતા. જ્યાં અંધારામાં શંકાસ્પદ રીતે જતી એક બોટની ઓળખ કરી ડ્રગ્સ કબજે કરવામાં આવ્યું હતું.