સલાલાહ. ભારતીય પુરુષ હોકી ટીમે રોમાંચક શૂટઆઉટ મેચમાં પાકિસ્તાનને 2-0થી હરાવીને પ્રથમ મેન્સ હોકી 5 એશિયા કપ ટુર્નામેન્ટ જીતી લીધી છે. આ મેચમાં બંને ટીમો નિર્ધારિત સમય સુધી 4-4 થી બરાબરી પર હતી પરંતુ શૂટઆઉટમાં ભારતનો વિજય થયો હતો. આ જીત સાથે, ભારતે FIH મેન્સ હોકી 5 વર્લ્ડ કપ 2024 માટે પણ ક્વોલિફાય કર્યું છે. ભારત માટે જુગરાજ સિંહે 7મી મિનિટે ગોલ કર્યો હતો જ્યારે મનિન્દર સિંહે 10મી મિનિટે ભારતને લીડ અપાવી હતી. આ પછી મોહમ્મદ રાહીલે 19મી અને 26મી મિનિટે બે ગોલ કર્યા હતા. શૂટઆઉટમાં ગુરજોત સિંહ અને મનિન્દર સિંહે ગોલ કર્યા હતા.
પાકિસ્તાન તરફથી અબ્દુલ રહેમાને પાંચમી મિનિટે અને કેપ્ટન અબ્દુલ રાણાએ 13મી મિનિટે ગોલ કર્યો હતો જ્યારે ઝિકારિયા હયાતે 14મી મિનિટે ગોલ કર્યો હતો. અરશદ લિયાકતે 19મી મિનિટે ગોલ કર્યો હતો. આ પહેલા ભારતે સેમિફાઇનલમાં મલેશિયાને 10-4થી હરાવીને ફાઇનલમાં પ્રવેશ કર્યો હતો. આ જીતે એશિયન ગેમ્સ માટે ભારતીય ટીમનું મનોબળ વધાર્યું છે.
ભારતીય ટીમે ટૂર્નામેન્ટમાં પ્રભુત્વ જમાવ્યું હતું અને 7 મેચમાં સૌથી વધુ કુલ 87 ગોલ કરીને રેકોર્ડ બનાવ્યો હતો. જ્યારે પાકિસ્તાને 7 મેચમાં 71 ગોલ કર્યા હતા જ્યારે ઓમાને 9 મેચમાં 38 ગોલ કર્યા હતા.
