પાલનપુર કોર્ટ પરિસરની બહાર આજે ભારે હોબાળો થયો હતો. જેમાં મિત્રતાના કરાર હેઠળ રહેતા યુવક અને યુવતીને કોર્ટમાં રજૂ કરવામાં આવ્યા હતા. એવા અહેવાલો છે કે યુવતીના પરિવારજનોએ હોબાળો મચાવ્યો હતો. પ્રાપ્ત વિગતો મુજબ પરિણીત યુવતી અન્ય યુવક સાથે મૈત્રી કરાર હેઠળ રહેતી હોવાથી યુવતીના પિતાએ કોર્ટ મારફત સર્ચ વોરંટ ઇસ્યુ કરતા પોલીસે યુવતીને રક્ષણ માટે કોર્ટમાં રજુ કરી હતી. તે સમયે યુવતીના પરિજનોએ કોર્ટ પરિસરની બહાર હોબાળો મચાવ્યો હતો. કોર્ટ પરિસરની બહાર હંગામો થતાં પાલનપુર શહેર પશ્ચિમ પોલીસ, પાલનપુર શહેર પૂર્વ પોલીસ, એલસીબી અને એસઓજી પોલીસનો કાફલો તૈનાત કરવામાં આવ્યો હતો. કોર્ટ પરિસરની બહાર મોટી સંખ્યામાં યુવતીના સંબંધીઓ એકઠા થયા હતા. ત્યારે ચુસ્ત પોલીસ તંત્ર અને પોલીસ બંદોબસ્ત વચ્ચે યુવક અને યુવતીને કોર્ટમાં રજૂ કરવામાં આવ્યા હતા.