રાજકોટ નગર પ્રાથમિક શિક્ષણ સમિતિના વિસર્જન બાદ હવે શિક્ષણ સમિતિની ચૂંટણીને લઈને મોટા સમાચાર સામે આવ્યા છે. રાજકોટ મહાનગરપાલિકા શિક્ષણ સમિતિની ચૂંટણી આગામી 19મી જૂનના રોજ યોજાનાર છે. આ ચૂંટણીને લઈને રાજકોટ મહાનગરપાલિકા વતી પણ જાહેરાત કરવામાં આવી છે.
શિક્ષણ સમિતિની ચૂંટણી જાહેર થતાં જ નવી શિક્ષણ સમિતિના અધ્યક્ષ કોણ બનશે? અને શિક્ષણ સમિતિના સભ્યો કોણ હશે? આ અંગે ચર્ચા શરૂ થઈ છે. શિક્ષણ સમિતિના ચેરમેનને લઈને અનેક નામો ચર્ચાઈ રહ્યા છે. શિક્ષણ સમિતિના અધ્યક્ષપદ માટે કિશોર રાઠોડ, વિક્રમ પુજારા જેવા નામો મોખરે છે. કુલ 12 બેઠકો માટે મતદાન પ્રક્રિયા 19 જૂને યોજાશે. જેમાં રાજકોટ મનપાના કાઉન્સિલરો મતદાન કરી શકશે.
શિક્ષણ સમિતિમાં પ્રવેશને લઈને ભાજપના નેતાઓમાં ઉત્સાહ. રાજકોટ શહેર ભાજપે વિસ્તારના નામોની યાદી મોકલી આપી છે. નવી શિક્ષણ સમિતિમાં ચેરમેન પદ માટે કિશોર રાઠોડનું નામ મોખરે છે. કિશોર રાઠોડ અગાઉ શિક્ષણ સમિતિમાં મહામંત્રી હતા. તો શિક્ષણ સમિતિના અધ્યક્ષપદ માટે પણ વિક્રમ પૂજારાના નામની ચર્ચા ચાલી રહી છે.
આપને જણાવી દઈએ કે 18 એપ્રિલે રાજકોટ મ્યુનિસિપલ પ્રાથમિક શિક્ષણ સમિતિના ચેરમેન સહિત તમામ સભ્યોએ રાજીનામું આપી દીધું હતું. 17મી એપ્રિલે ગાંધીનગર પ્રદેશ કાર્યાલય કમલમ ખાતે ભાજપ પ્રદેશ પ્રમુખ સી.આર.પાટીલની અધ્યક્ષતામાં રાજકોટ મ્યુનિસિપલ પ્રાથમિક શિક્ષણ સમિતિના સભ્યોની બેઠક બાદ 18મી એપ્રિલે રાજકોટ મ્યુનિસિપલ પ્રાથમિક શિક્ષણ સમિતિના ચેરમેન સહિત તમામ સભ્યોએ રાજીનામા આપી દીધા હતા.