બનાસકાંઠાઃ રાજસ્થાનના સિહોરી, પાલી અને જાલોર જિલ્લાની પાણીની સમસ્યાને ધ્યાનમાં રાખીને રાજસ્થાન સરકારે 2 નવા ડેમ બનાવવાનું ટેન્ડર પાસ કર્યું છે. જો રાજસ્થાન સરકાર દ્વારા આ ડેમ ઉપરવાસમાં બનાવવામાં આવે તો રાજસ્થાનથી ગુજરાત તરફ આવતું પાણી અટકી શકે છે. આ મુદ્દે રાજસ્થાન અને ગુજરાતમાં રાજકારણ શરૂ થયું છે.રાજસ્થાને પણ ડેમ નિર્માણને લઈને જવાઈ રિચાર્જનું કામ શરૂ કર્યું છે. જવાઈ ડેમ સુધીની 10 હજાર 33 હેક્ટર જમીન સંપાદન કરવાની પ્રાથમિક કામગીરી પણ શરૂ થઈ ગઈ છે અને સાડા 3 વર્ષમાં ડેમનું બાંધકામ પૂર્ણ કરવા માટે 1 હજાર 155 કરોડના ટેન્ડરો પણ પસાર કરવામાં આવ્યા છે. જેમાં હૈદરાબાદની PES એન્જીનીયરીંગ પ્રાઈવેટ લિમિટેડ કંપનીને વર્ક ઓર્ડર આપવામાં આવ્યો છે. જો આ 2 ડેમ બનાવવામાં આવશે તો રાજસ્થાનના 3 જિલ્લાના લોકોને સીધો ફાયદો થશે. રાજસ્થાનના પૂર્વ ધારાસભ્ય સમરજિત સિંહે પ્રતિક્રિયા આપતા કહ્યું કે આ પાણી રાજસ્થાનનું છે અને રાજસ્થાનને આ પાણીનો લાભ મળવો જ જોઈએ. ગુજરાતમાં પુષ્કળ પાણી છે. સાબરમતી નદીના પાણી ડેમ સુધી પહોંચવાનો સમય આવી ગયો છે. કોઈપણ સરકાર સંધિ કે કરારની વિરુદ્ધ જઈ શકે નહીં અને કોઈ સરકાર સાબરમતીના પાણીને રોકી શકે નહીં.