(GNS),તા.18
અમદાવાદ,
ગુજરાત સરકારના શિક્ષણ વિભાગ દ્વારા વિદ્યાર્થીઓને કોઈપણ પ્રકારની અગવડતા ન પડે તે માટે નિયમોમાં સતત સુધારા કરવામાં આવી રહ્યા છે. જે અંતર્ગત ગુજરાતના ઈતિહાસમાં પ્રથમ વખત ધોરણ 12 પછી કોલેજોમાં પ્રવેશ માટે સામાન્ય પ્રક્રિયા રાખવામાં આવી છે. પ્રથમ વખત સામાન્ય નોંધણી પ્રક્રિયા હાથ ધરવામાં આવી છે. આ પ્રક્રિયા વિવિધ કોલેજોમાં પ્રવેશ માટે સંઘર્ષ કરી રહેલા લાખો વિદ્યાર્થીઓને મોટી રાહત આપશે. ગુજરાત સરકારના શિક્ષણ વિભાગે પણ પરીક્ષા બોર્ડને સ્પષ્ટ માહિતી આપી છે કે તમામ પ્રવાહમાં ધોરણ 12ની પરીક્ષા પૂર્ણ થયા બાદ ત્રણ સપ્તાહમાં પ્રોવિઝનલ મેરિટ લિસ્ટ જાહેર કરવાનું રહેશે. આટલું જ નહીં ધોરણ 12ની પરીક્ષા બાદ આગામી દિવસોમાં કોલેજમાં પ્રવેશની પ્રક્રિયા માટે કોમન એડમિશન પોર્ટલ પર રજીસ્ટ્રેશન કરવાની જાહેરાત કરવામાં આવી હતી. હવે શિક્ષણ વિભાગે ઓનલાઈન રજીસ્ટ્રેશન પ્રક્રિયા કેવી રીતે થશે તેની વિગતો પણ જાહેર કરી છે. જેમાં ધોરણ 12ની પરીક્ષા પૂર્ણ થયા બાદ 1લી એપ્રિલથી ઓનલાઈન રજીસ્ટ્રેશન શરૂ કરવાનો નિર્ણય લેવામાં આવ્યો છે.
શિક્ષણ વિભાગે રજીસ્ટ્રેશનથી લઈને પ્રવેશ ફાળવણી સુધીની કામગીરી કેવી રીતે અને કયા સમયમાં થશે તેની જાહેરાત કરી છે. 14 યુનિવર્સિટીઓએ આ સમય મર્યાદામાં કામ કરવું પડશે. જો કોઈપણ યુનિવર્સિટીએ યુજી કોર્સમાં એન્ટ્રન્સ ટેસ્ટ આપવાની હોય તો એક સપ્તાહમાં એન્ટ્રન્સ ટેસ્ટ આપીને પ્રોવિઝનલ મેરિટ લિસ્ટ તૈયાર કરવાની કામગીરી કરવાની રહેશે. બાકીની યુનિવર્સિટીઓએ આ સમય દરમિયાન પ્રોવિઝનલ મેરિટ લિસ્ટ જાહેર કરવું પડશે. 1લી એપ્રિલથી ઓનલાઈન રજીસ્ટ્રેશન શરૂ થશે. વિદ્યાર્થીઓ પરિણામના બે સપ્તાહની અંદર ઓનલાઈન ફી ભરી શકશે અને પરિણામના ત્રણ સપ્તાહની અંદર ડોક્યુમેન્ટ વેરિફિકેશન પણ કરવાનું રહેશે. જેના આધારે પરિણામ બાદ ત્રણ સપ્તાહમાં પ્રોવિઝનલ મેરિટ લિસ્ટ જાહેર કરવાનું રહેશે. જો આ યાદીમાં કોઈ સમસ્યા હશે તો સુધારણા માટે વિદ્યાર્થીઓએ બે દિવસનો સમય આપવો પડશે. ત્યાર બાદ બે દિવસ બાદ ફાઇનલ મેરિટ લિસ્ટ જાહેર કરવામાં આવશે. રાજ્યમાં પ્રથમ વખત 12મા પછીના તમામ અભ્યાસક્રમોમાં પ્રવેશ માટે કોમન રજિસ્ટ્રેશન કરાવવાનો નિર્ણય લેવાયો છે. એટલે કે, રાજ્યની 14 સરકારી યુનિવર્સિટીઓમાં પ્રવેશ મેળવવા માંગતા વિદ્યાર્થીઓએ કોમન એડમિશન સર્વિસીસ (જીસીએએસ) પોર્ટલ પર રજીસ્ટ્રેશન કરાવવાનું રહેશે.
શિક્ષણ વિભાગ દ્વારા જાહેર કરાયેલી માર્ગદર્શિકા અનુસાર, ધોરણ 12ના પરિણામ જાહેર થયાના 1લી એપ્રિલથી બે અઠવાડિયા સુધી નોંધણી પ્રક્રિયા પૂર્ણ કરવાની રહેશે. 12માની પૂરક પરીક્ષાનું પરિણામ જાહેર થયા બાદ પોર્ટલ ફરીથી પાંચ દિવસ માટે શરૂ કરવામાં આવશે. આ ઉપરાંત જે વિદ્યાર્થીઓએ પૂરક પરીક્ષા પાસ કરી છે અથવા જેમની નોંધણી પ્રક્રિયા હજુ બાકી છે તેઓ રજીસ્ટ્રેશન કરાવી શકશે. તે યુનિવર્સિટીઓએ આ વિદ્યાર્થીઓને પ્રવેશ ફાળવવાનું કામ પાંચ દિવસમાં પૂર્ણ કરવાનું રહેશે. વિદ્યાર્થીઓના રજીસ્ટ્રેશન બાદ દરેક યુનિવર્સિટીનું લોગીન આઈડી આપવામાં આવશે. યુનિવર્સિટીઓએ તેમના વિવિધ ડિગ્રી અભ્યાસક્રમોની પ્રક્રિયા સ્વાયત્ત રીતે કરવાની રહેશે. જેમાં મેરિટ લિસ્ટ તૈયાર કરવામાં આવશે અને પૂરક પરીક્ષા સિવાયના વિદ્યાર્થીઓની પ્રક્રિયા ત્રણ રાઉન્ડમાં પૂર્ણ કરવાની રહેશે. આમ, ઓનલાઈન રજીસ્ટ્રેશન બાદ જ શિક્ષણ વિભાગ દરેક યુનિવર્સિટીને ડેટા સબમિટ કરશે અને તેના મેરિટના આધારે અલગ-અલગ કોલેજોમાં પ્રવેશ માટેની પ્રક્રિયા કરવાની રહેશે.