વલસાડ ન્યૂઝઃ વલસાડ જિલ્લાના વાપીમાં ભાજપના નેતાની હત્યા કરવામાં આવી હોવાની ઘટના પ્રકાશમાં આવી છે. રાતા ગામમાં બે બાઇક પર આવેલા અજાણ્યા લોકોએ વાપી તાલુકાના ભાજપના ઉપપ્રમુખ શૈલેષ પટેલ પર ગોળીબાર કર્યો હતો. જેમાં ગંભીર રીતે ઘવાયેલા શૈલેષ પટેલને હોસ્પિટલમાં લઈ જવાયા હતા જ્યાં તબીબે તેને મૃત જાહેર કર્યો હતો. બનાવની જાણ થતા પોલીસ કાફલો પહોંચી આગળની કાર્યવાહી હાથ ધરી છે.
પ્રાપ્ત માહિતી અનુસાર વાપી તાલુકાના ભાજપ ઉપપ્રમુખ શૈલેષ પટેલ પરિવાર સાથે આજે વહેલી સવારે રાતા ગામમાં આવેલા મંદિરે દર્શન કરવા ગયા હતા. પરિવાર મંદિરે જઈ રહ્યો હતો ત્યારે બાઇક પર આવેલા બે અજાણ્યા લોકોએ કારમાં બેઠેલા શૈલેષ પટલે પર ફાયરિંગ શરૂ કરી દીધું હતું. ફાયરિંગનો અવાજ સાંભળીને આસપાસના લોકો દોડી આવ્યા હતા. જોકે ત્યાં સુધીમાં બાઇક સવારો નાસી ગયા હતા.
ગોળી વાગતાની સાથે જ શૈલેષ પટેલ કારમાં પડી ગયો હતો. આ બનાવ અંગે સગાસંબંધીઓ અને એકઠા થયેલા લોકોએ પોલીસને જાણ કરી હતી અને શૈલેષ પટેલને ગંભીર હાલતમાં હોસ્પિટલમાં ખસેડાયો હતો. જો કે શૈલેષ પટેલનું સારવાર પહેલા મોત નિપજ્યું હતું. શૈલેષ પટેલના નિધનના સમાચારથી તેમના સમર્થકો અને પરિવારજનોમાં શોકનું મોજુ ફરી વળ્યું છે. પ્રાથમિક માહિતી મુજબ શૈલેષ પટેલની હત્યા કોઈ જૂની અંગત અદાવતમાં થઈ હોઈ શકે છે. પોલીસે ઘટના સ્થળે પહોંચી આગળની કાર્યવાહી હાથ ધરી છે.