ઝારખંડના રામગઢ જિલ્લામાં, મહિલાઓ ઘરના કામકાજ સંભાળવાની સાથે હોમગાર્ડની ભરતી પરીક્ષાની તૈયારીમાં વ્યસ્ત છે. સંસાધનોની અછત હોવા છતાં, ગરીબ પરિવારની મહિલાઓ સાડીમાં ખુલ્લા પગે દોડીને 284 હોમગાર્ડની જગ્યાઓ માટે યોજાનારી આ પરીક્ષા માટે પ્રેક્ટિસ કરી રહી છે. આ મહિલાઓ પાસે ન તો જૂતા છે કે ન તો ટ્રેકસૂટ… આ મહિલાઓનો સાડીમાં ખુલ્લા પગે દોડવાનો વીડિયો સોશિયલ મીડિયા પર વાયરલ થઈ રહ્યો છે.
ટ્રેક સૂટ અને શૂઝ પણ નહીં
હોમગાર્ડની ભરતીની પરીક્ષા પહેલા રનિંગ પ્રેક્ટિસ દરમિયાન સાડીમાં ખુલ્લા પગે દોડતી મહિલાઓનો વીડિયો સોશિયલ મીડિયા પર વાયરલ થયો હતો. વાયરલ વીડિયોમાં જોઈ શકાય છે કે મહિલાઓ પાસે ટ્રેક સૂટ અને શૂઝ પણ નથી. રેસ પૂરી કરવાની પ્રેક્ટિસ કરી રહેલી બુઢા-ખુકરા ગામની રહેવાસી સુનિતા (35)એ કહ્યું- હું એક ગરીબ ખેડૂત પરિવારમાંથી આવું છું. મારા પતિને ‘ટ્રેક સૂટ’, ‘ટી-શર્ટ’ અને શૂઝ ખરીદવાનું પોસાય તેમ નથી.
સુનીતાનો વીડિયો વાયરલ
સુનીતાએ જણાવ્યું કે તે ગામની અન્ય મહિલાઓ સાથે ગામથી લગભગ 8 કિલોમીટર દૂર આવેલા સિદ્ધુ કાન્હુ મેદાનમાં જાય છે. આ ગ્રાઉન્ડમાં વિસ્તારની તમામ મહિલાઓ દોડવાની પ્રેક્ટિસ કરી રહી છે. સુનીતાએ કહ્યું કે ટ્રેક સૂટ અને શૂઝ જેવા સંસાધનો ન હોવા છતાં અમે મહિલાઓએ માત્ર સાડીમાં જ દોડવાનું નક્કી કર્યું છે. સુનિતાનો દોડતો એક વીડિયો વાયરલ થઈ રહ્યો છે.
સાડીમાં 8 મિનિટની રેસ 7 મિનિટમાં પૂરી કરી
જ્યારે સુનિતાને વિડિયો વાયરલ થવા અંગે પૂછવામાં આવ્યું તો તેણે કહ્યું કે તેણીને ખબર નહોતી કે તેનો વીડિયો વાયરલ થયો છે. સુનીતાએ જણાવ્યું કે તે સાડી પહેરીને નિર્ધારિત સમય પહેલા રેસ પૂરી કરી રહી હતી. તેણે કહ્યું- મેં સાડી પહેરીને 7 મિનિટમાં 1,600 મીટરની રેસ પૂરી કરી. 1,600 મીટરની દોડ માટે 8 મિનિટનો સમય ફાળવવામાં આવ્યો છે. સુનીતા કહે છે કે પરીક્ષામાં આવવા માટે તેનો ઉત્સાહ વધારે છે.
