માનવીય ક્રૂરતાનું આવું ચિત્ર તમે ભાગ્યે જ જોયું હશે. માછલી પકડીને આજીવિકા મેળવવી એ સામાન્ય બાબત છે, પરંતુ વ્હેલ અને ડોલ્ફિન જેવી સેંકડો માછલીઓને છરી વડે જીવતી કાપી નાંખવી અને પછી તેમને દુઃખી થતા જોઈને ઉજવણી કરવી એ ખૂબ જ હૃદયદ્રાવક છે. ડેનમાર્કના ફેરો ટાપુઓ પર, લોકો દર વર્ષે એકવાર આવા ક્રૂર ‘તહેવાર’ની ઉજવણી કરે છે. આ ઘટનાને ‘ધ ગ્રાઇન્ડ’ કહેવામાં આવે છે.
દરિયાનું પાણી લાલ થઈ ગયું
આ હત્યાકાંડને જોવા માટે મોટી સંખ્યામાં મહિલાઓ અને બાળકો પણ આવે છે. આ વખતે ‘ધ ગ્રાઇન્ડ’ દરમિયાન, અંદાજે 700 વ્હેલ અને ડોલ્ફિનને હોડી દ્વારા કિનારે ખેંચવામાં આવી હતી અને પછી છીછરા સમુદ્રમાં છરીઓ વડે તેમના ટુકડા કરી દેવામાં આવ્યા હતા. માછલીઓની આટલી ક્રૂર હત્યાથી એટલું લોહી વહી ગયું કે દરિયાનું પાણી લાલ થઈ ગયું.
મળતી માહિતી મુજબ આ ઈવેન્ટનું આયોજન 27મી મેના રોજ કરવામાં આવ્યું હતું. આ પછી દરિયા કિનારે સેંકડો માછલીઓ પડેલી જોવા મળી હતી. ફેરો આઇલેન્ડ્સના વૈશ્વિક દરિયાઇ સંરક્ષણ જૂથ સી શેફર્ડના ડિરેક્ટર વેલેન્ટિના ક્રેસ્ટે જણાવ્યું હતું કે તેણીએ યુરોપિયન સરકારોને કાર્યક્રમ પર પ્રતિબંધ મૂકવા માટે હાકલ કરી છે પરંતુ તેનું સાંભળવામાં આવ્યું નથી. અહેવાલો અનુસાર, ‘ધ ગ્રાઇન્ડ’ના દિવસે ઓછામાં ઓછી 402 વ્હેલ અને 300 ડોલ્ફિન માર્યા ગયા હતા.
PETAના પ્રમુખ એલિસા એલને જણાવ્યું હતું કે આ જળચર જીવો કર્કશ અને પીડાથી રડે છે. વ્હેલ અને ડોલ્ફિન જેવી માછલીઓ તેમના પરિવાર સાથે રહે છે અને તેમના સમગ્ર પરિવારને આ રીતે નિર્દયતાથી મારી નાખવામાં આવે છે. આ માછલીઓ વધુ સંવેદનશીલ હોય છે અને તેથી તેઓ વધુ પીડા અનુભવે છે. એક પ્રાણી અધિકાર કાર્યકર્તાએ કહ્યું કે આ ક્રૂર કાર્યક્રમ 1000 વર્ષથી ચાલી રહ્યો છે. ફારો એક સ્વતંત્ર રાજ્ય છે અને તેના લોકો તેને તેમની સંસ્કૃતિનો એક ભાગ માને છે.
ફેરોનું વહીવટીતંત્ર પણ કહે છે કે આ તહેવાર દરમિયાન પર્યાવરણનું પણ સંપૂર્ણ ધ્યાન રાખવામાં આવે છે. તેમનું કહેવું છે કે ઉત્તર એટલાન્ટિકમાં વ્હેલ અને ડોલ્ફિનની સંખ્યા ઘણી સારી છે. આ સ્થિતિમાં પર્યાવરણને નુકસાન થતું નથી. મળતી માહિતી મુજબ તોરશવનમાં 402 પાયલટ વ્હેલ અને 4 બોટલનોઝ ડોલ્ફિન માર્યા ગયા છે. સ્કેલાબોટનુરમાં 168 સફેદ-બાજુવાળી ડોલ્ફિન અને વ્હાલવિકમાં 132 સફેદ-બાજુવાળા ડોલ્ફિન માર્યા ગયા હતા.
