ઈરાન અને અમેરિકા વચ્ચે બે સપ્તાહના યુદ્ધવિરામ બાદ પણ લેબનોનમાં ઈઝરાયેલના હવાઈ હુમલા ચાલુ છે. ઈરાન દાવો કરે છે કે 10-પોઈન્ટ પ્લાનમાં એક મુદ્દામાં લેબનોનમાં હુમલા રોકવાનો સમાવેશ થાય છે, પરંતુ અમેરિકા અને ઈઝરાયેલ આ વાતને નકારી રહ્યાં છે. દરમિયાન, વડા પ્રધાન બેન્જામિન નેતન્યાહુએ ગુરુવારે જણાવ્યું હતું કે ઇઝરાયેલ જ્યાં જરૂર પડશે ત્યાં ઇરાન સમર્થિત હિઝબુલ્લાહ પર હુમલો કરવાનું ચાલુ રાખશે. આ નિવેદન લેબનોન પર ઈઝરાયેલના ઘાતક હુમલાના એક દિવસ બાદ આવ્યું છે.
નેતન્યાહુએ તેમના અંગત એક્સ એકાઉન્ટ પર જણાવ્યું હતું કે, “અમે સંપૂર્ણ શક્તિ, ચોકસાઈ અને નિશ્ચય સાથે હિઝબોલ્લાહ પર હુમલો કરવાનું ચાલુ રાખીએ છીએ.” તેમણે ઉમેર્યું, “અમારો સંદેશ સ્પષ્ટ છે, અમે ઇઝરાયેલના નાગરિકો વિરુદ્ધ કાર્યવાહી કરનાર કોઈપણ પર હુમલો કરીશું. જ્યાં સુધી અમે ઇઝરાયલના ઉત્તરના રહેવાસીઓ માટે સંપૂર્ણ સુરક્ષા પુનઃસ્થાપિત ન કરીએ ત્યાં સુધી અમે જ્યાં સુધી જરૂરી હોય ત્યાં હિઝબોલ્લાહ પર હુમલો કરવાનું ચાલુ રાખીશું.”
ઇઝરાયેલી સૈન્યએ કહ્યું કે તે દક્ષિણ લેબનોનમાં જમીની કાર્યવાહી ચાલુ રાખી રહી છે. સેનાના સૈનિકો માર્ચની શરૂઆતથી આ વિસ્તારમાં હિઝબુલ્લાહ સામે લડી રહ્યા છે અને તેમની સ્થિતિ મજબૂત કરી છે. એક અલગ નિવેદનમાં, સેનાએ કહ્યું કે તેણે રાત્રિ દરમિયાન બે મહત્વપૂર્ણ માર્ગો પર હુમલો કર્યો. આ માર્ગોનો ઉપયોગ હિઝબુલ્લાહ આતંકવાદીઓ અને કમાન્ડરો દ્વારા લેબનોનની લિતાની નદીના ઉત્તરથી દક્ષિણ તરફ જવા માટે કરવામાં આવતો હતો, જેથી તેઓ હજારો શસ્ત્રો, રોકેટ અને પ્રક્ષેપણોને એક જગ્યાએથી બીજી જગ્યાએ લઈ જઈ શકે.
