લોંગ આઇલેન્ડના જળાશયોમાં એક જીવલેણ બેક્ટેરિયા મળી આવ્યો છે જે મનુષ્ય અને કૂતરા બંનેને મારી શકે છે. સ્ટોની બ્રુક યુનિવર્સિટીના નવા અભ્યાસમાં ચેતવણી આપવામાં આવી છે કે વિબ્રિઓ વલ્નિફિકસ નામના આ બેક્ટેરિયાથી સંક્રમિત 20 ટકા દર્દીઓ 48 કલાકની અંદર મૃત્યુ પામી શકે છે. સંશોધકોએ જણાવ્યું હતું કે આ બેક્ટેરિયા શરીરમાં ઝડપથી ફેલાય છે અને જો સમયસર સારવાર ન કરવામાં આવે તો તે જીવલેણ મુશ્કેલીઓનું કારણ બને છે.
આ અભ્યાસનું નેતૃત્વ કરનાર પ્રોફેસર ક્રિસ્ટોફર ગોબલરે ન્યૂયોર્ક પોસ્ટને જણાવ્યું કે આ બેક્ટેરિયા અત્યંત જોખમી છે, ખાસ કરીને ઉનાળામાં જ્યારે ગરમ પાણી તેને ઝડપથી વધવામાં મદદ કરે છે. સેન્ટર્સ ફોર ડિસીઝ કંટ્રોલ એન્ડ પ્રિવેન્શન (CDC) આ બેક્ટેરિયાને ‘માંસ ખાનારા’ બેક્ટેરિયા તરીકે વર્ણવી ચૂક્યું છે. પ્રોફેસર ગોબલરે કહ્યું કે તે ખુલ્લા ઘા અથવા ઇજાઓ દ્વારા શરીરમાં પ્રવેશ કરે છે. ચેપગ્રસ્ત દર્દીઓમાં, 48 કલાકની અંદર મૃત્યુ થવાની સંભાવના 20 ટકા છે.
સમસ્યા માત્ર એક જગ્યા પુરતી મર્યાદિત નથી
આ ખતરો માત્ર કેટલાક તળાવો પૂરતો સીમિત નથી. ઇસ્ટ ક્વોગ સહિત ઘણા વિસ્તારોમાં પાણી બેક્ટેરિયાથી દૂષિત હોવાનું જાણવા મળ્યું છે, જે ત્યાં શેલફિશ અને ઓઇસ્ટર્સ ખાવા માટે અસુરક્ષિત બનાવે છે. સ્થાનિક રહેવાસીઓએ જણાવ્યું હતું કે છેલ્લા કેટલાક વર્ષોમાં પાણીની સ્થિતિ નોંધપાત્ર રીતે બગડી છે. એક રહેવાસીએ કહ્યું કે હું પૂર્વ ક્વોગમાં પાણીની બાજુમાં રહું છું. પહેલા પાણી ખૂબ જ સ્વચ્છ અને ઉપયોગી હતું, હવે તે જોઈને નિરાશા થાય છે.
સંશોધકોના મતે, સાગાપોનેક પોન્ડ, મેકોક્સ બે અને જ્યોર્જિકા પોન્ડ સહિત ઘણા જળાશયો હાનિકારક શેવાળની અતિશય વૃદ્ધિ અનુભવી રહ્યા છે. આ શેવાળ ઝેરી પદાર્થો છોડે છે જે દરિયાઈ જીવો, છીપ ઉદ્યોગ અને મનુષ્યો માટે પણ ખતરનાક સાબિત થઈ શકે છે. પ્રો.ગોબલરે તેનું કારણ પણ સમજાવ્યું. તેમણે કહ્યું કે જમીનથી સમુદ્રમાં નાઈટ્રોજનનો સૌથી મોટો સ્ત્રોત ઓનસાઈટ સેપ્ટિક સિસ્ટમ્સ છે. સફોક કાઉન્ટીના મોટાભાગના વિસ્તારોમાં ગટર વ્યવસ્થા નથી, જેના કારણે આ સમસ્યા વધી રહી છે.
કૂતરાઓના મૃત્યુના કિસ્સા પણ છે
આ બેક્ટેરિયા મૂળ મેક્સિકોના અખાત જેવા ગરમ દરિયાકાંઠાના વિસ્તારોમાંથી આવ્યા હતા. તે સૌપ્રથમ 2023 માં લોંગ આઇલેન્ડ સાઉન્ડમાં મળી આવ્યું હતું, જ્યાં તે ત્રણ મૃત્યુ સાથે જોડાયેલું હતું. હવે તે અન્ય જળાશયોમાં પણ ફેલાઈ છે. ચિંતા વ્યક્ત કરતાં પ્રો. ગોબલરે કહ્યું કે લોંગ આઇલેન્ડમાં એવા કૂતરા છે જેઓ તળાવનું પાણી પીવાથી બીમાર પડ્યા અને મૃત્યુ પામ્યા. જો કે 2023 થી કોઈ નવા મૃત્યુ નોંધાયા નથી, વૈજ્ઞાનિકો કહે છે કે ખતરો હજુ પણ છે, ખાસ કરીને ઉનાળાની ઋતુ દરમિયાન.
