ઈઝરાયેલના વડાપ્રધાન બેન્જામિન નેતન્યાહુએ ફરી એકવાર ભારતની દિલથી પ્રશંસા કરી છે. તેમણે કહ્યું છે કે ભારતમાં ઈઝરાયલ માટે અપાર પ્રેમ છે. આ સમય દરમિયાન, નેતન્યાહૂએ એ દાવાઓને સંપૂર્ણપણે ફગાવી દીધા છે કે ઇઝરાયેલ વિશ્વભરમાં અલગ થઈ રહ્યું છે. નેતન્યાહૂએ આરોપ લગાવ્યો કે મીડિયા અને સોશિયલ મીડિયા દ્વારા ઈઝરાયેલને બદનામ કરવાનું ષડયંત્ર રચવામાં આવી રહ્યું છે.
અમેરિકન ન્યૂઝ પ્રોગ્રામ ’60 મિનિટ્સ’ને આપેલા ઈન્ટરવ્યુમાં નેતન્યાહૂએ ભારતનું ઉદાહરણ આપ્યું અને કહ્યું કે વિશ્વના સૌથી મોટા લોકતંત્રમાં ઈઝરાયેલનું સન્માન અસાધારણ છે. પોતાની ભારત મુલાકાતને યાદ કરતા નેતન્યાહુએ કહ્યું, “મારી ભારત મુલાકાત ‘લવ ફેસ્ટ’ જેવી હતી. ત્યાંના લોકો ઈઝરાયલ પ્રત્યે ઊંડી સહાનુભૂતિ અને સન્માન ધરાવે છે.”
પીએમ મોદીનો ઉલ્લેખ કરતા તેમણે યાદ કર્યું કે જ્યારે વડાપ્રધાન મોદી ઈઝરાયેલ આવ્યા હતા ત્યારે તેમનું પણ એટલું જ ઉષ્માભર્યું સ્વાગત કરવામાં આવ્યું હતું. નેતન્યાહુએ વધુમાં કહ્યું કે તેમની પત્ની સારા અને તેમને ભારતમાં મળેલો પ્રેમ દર્શાવે છે કે ઈઝરાયેલ દુનિયામાં એકલું નથી.
ઈઝરાયલ વિરુદ્ધ પ્રચાર ચાલી રહ્યો છે…
નેતન્યાહૂએ વધુમાં આરોપ લગાવ્યો કે કેટલાક દેશો સોશિયલ મીડિયા દ્વારા ઈઝરાયેલને બદનામ કરવાનું કાવતરું ઘડી રહ્યા છે. તેમણે કહ્યું કે પશ્ચિમી મીડિયા અને સોશિયલ મીડિયામાં ઈઝરાયલ વિરુદ્ધ ખોટુ નિવેદન આપવામાં આવી રહ્યું છે. ઈઝરાયેલના પીએમએ વધુમાં સ્વીકાર્યું કે અત્યાર સુધી તેઓ આ ‘પ્રચાર’નો અસરકારક રીતે સામનો કરી શક્યા નથી, પરંતુ હવે ઈઝરાયેલ આ માહિતી યુદ્ધમાં વળતો હુમલો કરવા તૈયાર છે.
