પાકિસ્તાને અમેરિકી રાષ્ટ્રપતિ ડોનાલ્ડ ટ્રમ્પને જોરદાર ઝટકો આપ્યો છે. પાકિસ્તાને અબ્રાહમ સમજૂતીમાં સામેલ થવાની ટ્રમ્પની અપીલને સ્પષ્ટપણે નકારી કાઢી છે. પાકિસ્તાનના રક્ષા મંત્રી ખ્વાજા આસિફે એક નિવેદનમાં કહ્યું છે કે પાકિસ્તાન ક્યારેય આ સમજૂતીમાં સામેલ થવા માંગશે નહીં. તેમણે કહ્યું છે કે તે દેશની મૂળભૂત વિચારધારાની વિરુદ્ધ છે. આ દરમિયાન તેમણે ઈઝરાયલ તરફ ઈશારો કરીને કહ્યું કે જે દેશો પર ભરોસો નથી તેઓ સાથે એક જ ટેબલ પર બેસી ન શકાય.
આ પહેલા અમેરિકી રાષ્ટ્રપતિ ડોનાલ્ડ ટ્રમ્પે સોમવારે એક ખૂબ જ લાંબી પોસ્ટમાં દાવો કર્યો હતો કે ઈરાન સાથે તેમની શાંતિ વાટાઘાટો ખૂબ જ સારી રીતે આગળ વધી રહી છે. ટ્રમ્પે કહ્યું હતું કે ઈરાન સાથે અંતિમ સમજૂતી થતાં જ સાઉદી અરેબિયા, કતાર, તુર્કી, ઈજીપ્ત, જોર્ડન અને પાકિસ્તાને સાથે મળીને ઈઝરાયેલ સાથે સામાન્ય સંબંધો સ્થાપિત કરવા માટે અબ્રાહમ સમજૂતી પર હસ્તાક્ષર કરવા જોઈએ. ટ્રમ્પે એવો પણ દાવો કર્યો હતો કે તેમણે આ મામલે પાકિસ્તાની આર્મી ચીફ ફિલ્ડ માર્શલ અસીમ મુનીર સાથે પણ વાત કરી હતી.
ઈઝરાયેલમાં ભરોસો નથી- ખ્વાજા આસિફ
જો કે ટ્રમ્પના આ દાવાને પાકિસ્તાનના રક્ષા મંત્રીએ ફગાવી દીધો હતો. ખ્વાજા આસિફે પાકિસ્તાની ચેનલ ‘સામા ટીવી’ને આપેલા ઈન્ટરવ્યુમાં કહ્યું, “વ્યક્તિગત રીતે, મને નથી લાગતું કે અમારે કોઈ એવી સમજૂતીમાં સામેલ થવું જોઈએ જે અમારી મૂળભૂત વિચારધારાઓ સાથે મેળ ખાતું ન હોય. આ મુદ્દા પર અમારું વલણ હંમેશા સ્પષ્ટ રહ્યું છે કે તે અમને કોઈપણ કિંમતે સ્વીકાર્ય નથી.”
પાકિસ્તાની રક્ષા મંત્રીએ વધુમાં કહ્યું કે, “તમે એવા લોકો સાથે ટેબલ પર કેવી રીતે બેસી શકો કે જેમના શબ્દો અને વચનો પર એક દિવસ માટે પણ વિશ્વાસ ન કરી શકાય?” ખ્વાજા આસિફે કહ્યું કે પાકિસ્તાન ક્યારેય યહૂદી રાષ્ટ્રને માન્યતા આપી શકે નહીં. તેમણે કહ્યું કે, “આપણે દુનિયાનો એકમાત્ર એવો દેશ છીએ કે જેના પાસપોર્ટમાં સ્પષ્ટ લખ્યું છે કે તે ઈઝરાયેલ સિવાય વિશ્વના તમામ દેશો માટે માન્ય છે. અમારા પાસપોર્ટ પર ઈઝરાયેલનું નામ પણ નથી.”
