પ્રશાંત મહાસાગરમાં ચીન દ્વારા કરવામાં આવેલા મિસાઈલ પરીક્ષણે અમેરિકા સહિત ઈન્ડો-પેસિફિક દેશોની ઊંઘ હરામ કરી દીધી છે. ચીને તેની પરમાણુ સંચાલિત સબમરીનથી લાંબા અંતરની બેલેસ્ટિક મિસાઈલનું પરીક્ષણ કર્યું છે. આ પરીક્ષણ બાદ અમેરિકાએ બેઈજિંગ પર તેના પરમાણુ હથિયારોના ભંડારમાં ઝડપથી વધારો કરવાનો આરોપ લગાવ્યો છે, જ્યારે પ્રાદેશિક સરકારોએ આ પગલાને ઉશ્કેરણીજનક અને પ્રદેશને અસ્થિર કરનારું ગણાવ્યું છે.
મિસાઈલ પરીક્ષણ સંબંધિત મહત્વપૂર્ણ બાબતો:
- ચીને સોમવારે આ મિસાઈલ છોડી હતી, જેમાં ‘ડમી વોરહેડ’ (નકલી હથિયાર) હતી.
- બેઇજિંગે તેને તેની નિયમિત અને વાર્ષિક સૈન્ય કવાયત ગણાવી છે.
- છેલ્લા બે વર્ષમાં આ બીજી વખત છે જ્યારે ચીને જાહેરમાં પ્રશાંત મહાસાગરમાં લાંબા અંતરની મિસાઈલ છોડવાની વાત સ્વીકારી છે.
અમેરિકાએ ભારે ચિંતા વ્યક્ત કરી હતી
આ પરીક્ષણ બાદ અમેરિકાએ ચીનના વધતા પરમાણુ કાર્યક્રમની આકરી ટીકા કરી છે. યુએસ સ્ટેટ ડિપાર્ટમેન્ટના પ્રવક્તા ટોમી પિગોટે જણાવ્યું હતું કે, “એવા સમયે જ્યારે યુનાઇટેડ સ્ટેટ્સ પરમાણુ પ્રસારને રોકવા માટે પહેલા કરતા વધુ કરી રહ્યું છે, ત્યારે ચીન તેનાથી વિપરીત કરી રહ્યું છે.” તેમણે બેઇજિંગના ઝડપી અને અપારદર્શક હથિયારોના વધારા અંગે ચિંતા વ્યક્ત કરી હતી. સાથે જ ચીનને આર્મ્સ કંટ્રોલ પર સાર્થક મંત્રણા કરવા અને આવી મિસાઈલો છોડતા પહેલા માહિતી આપવાની નિયમિત સિસ્ટમ બનાવવાની અપીલ કરી.
તાઈવાન અને ફિલિપાઈન્સ સહિતના આ દેશોએ જોરદાર વિરોધ કર્યો હતો
આ મિસાઈલ પ્રક્ષેપણ પર ક્ષેત્રીય દેશોએ તીખી પ્રતિક્રિયા આપી છે. ફિલિપાઈન્સે તેને “લશ્કરી દળનું બેજવાબદાર પ્રદર્શન” ગણાવ્યું અને કહ્યું કે તેનો કોઈ શાંતિપૂર્ણ હેતુ નથી. જે દેશો ચીનની વિસ્તરણવાદી નીતિઓનો વિરોધ કરી રહ્યા છે તેમની સામે આ જાણી જોઈને ઉશ્કેરણી છે.
તાઈવાનની રાષ્ટ્રીય સુરક્ષા પરિષદના મહાસચિવ જોસેફ વુએ કહ્યું કે તે JL-2 મિસાઈલ હતી, જે પ્રશાંત મહાસાગરમાં પડતા પહેલા ફિલિપાઈન્સની ઉપરથી પસાર થઈ હતી. તેણે સોશિયલ મીડિયા પ્લેટફોર્મ ‘X’ પર લખ્યું, “ચીને ફરી એકવાર સાબિત કર્યું છે કે તે આ ક્ષેત્રનો દાદા છે.”
ઑસ્ટ્રેલિયાએ તેને પ્રદેશને અસ્થિર બનાવવાનું પગલું ગણાવ્યું, જ્યારે જાપાને ચીનની વધતી જતી સૈન્ય પ્રવૃત્તિઓ પર ‘ગંભીર ચિંતા’ વ્યક્ત કરી અને બેઇજિંગને પુનર્વિચાર કરવા વિનંતી કરી.
