મેક્સિકોમાં 7.4ની તીવ્રતાનો તીવ્ર ભૂકંપ આવ્યો છે. અહેવાલો અનુસાર, તેનું કેન્દ્ર દેશના દક્ષિણી રાજ્ય ચિયાપાસ પાસે હતું. આ શક્તિશાળી ભૂકંપના કારણે મેક્સિકો અને આસપાસના ઘણા દેશો જેમ કે અલ સાલ્વાડોર અને ગ્વાટેમાલામાં આંચકા અનુભવાયા છે. જો કે માનવ નુકશાન અંગે હજુ સુધી કોઈ સ્પષ્ટ માહિતી બહાર આવી નથી.
યુએસ જીઓલોજિકલ સર્વે (યુએસજીએસ) વિભાગે શુક્રવારે આવેલા આ ભૂકંપ અંગે સ્પષ્ટ માહિતી આપી હતી. તેમણે જણાવ્યું કે ભૂકંપનું કેન્દ્ર મેક્સિકોના પ્યુર્ટો માડેરો શહેરથી લગભગ 10 કિલોમીટરની ઊંડાઈમાં હતું. હવે આફ્ટરશોકના કારણે વધુ આંચકા આવવાની શક્યતા છે. અહેવાલો અનુસાર, 7.4ની તીવ્રતાના આંચકા પછી, ઘણા વધુ આંચકા આવ્યા. આમાં સૌથી જોરદાર આંચકો 6.1ની તીવ્રતાનો હતો.
મેક્સીકન રાષ્ટ્રપતિ ક્લાઉડિયા શેનબૌમે જણાવ્યું હતું કે ભૂકંપ પછી ચિઆપાસ અને તાબાસ્કો રાજ્યોમાં નુકસાનના કોઈ તાત્કાલિક અહેવાલ નથી. અસરગ્રસ્ત વિસ્તારોમાં નુકસાનનું મૂલ્યાંકન ચાલુ છે અને અધિકારીઓ પરિસ્થિતિ પર નજર રાખી રહ્યા છે. તે જ સમયે, ગ્વાટેમાલાના રાષ્ટ્રપતિ બર્નાર્ડો અરેવાલોએ પણ પુષ્ટિ કરી કે, “અત્યાર સુધી કોઈના મૃત્યુના સમાચાર નથી. એજન્સીઓ ક્ષણેક્ષણે સ્થિતિ પર નજર રાખી રહી છે.” તેમણે વધુમાં કહ્યું કે, “હું લોકોને શાંત રહેવા અને આવા મામલાઓમાં આપવામાં આવેલી સલાહને અનુસરવાની અપીલ કરું છું.”
સુનામીની ચેતવણી જારી
આ શક્તિશાળી ભૂકંપ બાદ યુએસ સુનામી વોર્નિંગ સિસ્ટમે આ વિસ્તાર માટે સુનામીની ચેતવણી જાહેર કરી છે. આ સાથે તેમણે અસરગ્રસ્ત તટીય વિસ્તારોમાં દરિયાની સપાટીમાં ખતરનાક ફેરફારોની સંભાવના અંગે ચેતવણી આપી હતી.
ભૂકંપ પછીના ઘણા વીડિયો સોશિયલ મીડિયા પર વાયરલ થઈ રહ્યા છે. આમાં ઈમારતો ઝડપથી ધ્રૂજતી જોવા મળી રહી છે.
