અમેરિકી રાષ્ટ્રપતિ ડોનાલ્ડ ટ્રમ્પે કહ્યું છે કે તેઓ આ વર્ષે ઉત્તર કોરિયાના સર્વોચ્ચ નેતા કિમ જોંગ ઉન સાથે મુલાકાત કરશે. ટ્રમ્પે કહ્યું છે કે કિમ જોંગ ઉન અને તેમના વચ્ચે સારા સંબંધ છે. ટ્રમ્પે વ્હાઇટ હાઉસમાં પત્રકારો સાથે વાત કરતા આ વાત કહી. તેમને પૂછવામાં આવ્યું કે શું તેઓ આ વર્ષના અંતમાં કિમને મળવાની રાહ જોઈ રહ્યા છે. “હા, હું (તેની સાથે મળીશ)” ટ્રમ્પે કહ્યું. તેમણે દાવો કર્યો હતો કે ઉત્તર કોરિયા પાસે 57 ‘અત્યંત શક્તિશાળી’ પરમાણુ હથિયારો છે. આ પહેલીવાર છે જ્યારે ટ્રમ્પે ઉત્તર કોરિયાના પરમાણુ ભંડારની ચોક્કસ સંખ્યા આપી છે.
એક દિવસ પહેલા ‘ધ વોલ સ્ટ્રીટ જર્નલે’ અહેવાલ આપ્યો હતો કે ટ્રમ્પ કિમ સાથેની બેઠકની તૈયારી માટે તેમના સહયોગીઓ પર દબાણ કરી રહ્યા છે. આવી બેઠક નવેમ્બરમાં ચીનના શેનઝેનમાં યોજાનારી એશિયા-પેસિફિક ઇકોનોમિક કોઓપરેશન (APEC) સમિટમાં ટ્રમ્પની સંભવિત મુલાકાત દરમિયાન થઇ શકે છે. ટ્રમ્પે જો કે કિમ સાથે વાતચીત ફરી શરૂ કરવાની તેમની યોજના અંગે વિગતો આપી ન હતી. લેખિત પત્રો દ્વારા કિમના સંપર્કમાં છે કે કેમ તે અંગે પૂછવામાં આવતા તેણે કહ્યું હતું કે, હું તમને તે કહી શકું તેમ નથી.
ટ્રમ્પે પાછળથી બીજી એક ન્યૂઝ કોન્ફરન્સમાં ઉત્તર કોરિયાનું પરમાણુ નિઃશસ્ત્રીકરણ હજુ પણ કિમ સાથેની વાટાઘાટો શરૂ કરવાનો તેમનો ધ્યેય છે કે કેમ તે અંગેના પ્રશ્નોના જવાબ આપવાનો ઇનકાર કર્યો હતો. આનાથી ભય ઊભો થયો છે કે તેમનું વહીવટીતંત્ર સંપૂર્ણ અણુશસ્ત્રીકરણને બદલે તણાવ ઘટાડવા અને પરમાણુ જોખમોનું સંચાલન કરવા જેવા મર્યાદિત લક્ષ્યો પર ધ્યાન કેન્દ્રિત કરી શકે છે. ટ્રમ્પ પ્રશાસને અગાઉ ઉત્તર કોરિયાના ‘સંપૂર્ણ’ પરમાણુ નિઃશસ્ત્રીકરણની પ્રતિબદ્ધતાનો પુનરોચ્ચાર કર્યો છે.
‘મારા કિમ જોંગ ઉન સાથે સારા સંબંધો છે’
ટ્રમ્પે કહ્યું, “હું તેના વિશે વાત કરવા માંગતો નથી, પરંતુ જેમ તમે જાણો છો, મારા કિમ જોંગ-ઉન સાથે સારા સંબંધ છે. તેઓ (જો) બિડેનને પસંદ કરતા ન હતા. તેઓ (બરાક) ઓબામાને પસંદ કરતા ન હતા. તેઓ કોઈને પસંદ કરતા ન હતા, પરંતુ તેઓ મને પસંદ કરે છે,” ટ્રમ્પે કહ્યું. ટ્રમ્પની ટિપ્પણી એવા સમયે આવી છે જ્યારે કિમ સાથે તેમની અંગત મુત્સદ્દીગીરી ફરી શરૂ કરવાની સંભાવના અંગે અટકળો ચાલી રહી છે. પોતાના પ્રથમ કાર્યકાળમાં ટ્રમ્પે કિમ સાથે ત્રણ બેઠકો કરી હતી. બંને નેતાઓની પ્રથમ બેઠક જૂન 2018માં સિંગાપોરમાં, બીજી ફેબ્રુઆરી 2019માં હનોઈમાં અને ત્રીજી જૂન 2019માં આંતર-કોરિયાઈ સરહદી ગામ પનમુનજોમમાં થઈ હતી.
દક્ષિણ કોરિયા-યુએસ સંયુક્ત સૈન્ય અભ્યાસમાં ઘટાડો કરવાના ટ્રમ્પના તાજેતરના નિર્દેશથી પણ આ અટકળોને મજબૂતી મળી છે. આને ઉત્તર કોરિયા તરફના સમાધાનકારી પગલા તરીકે જોવામાં આવી રહ્યું છે. ઉત્તર કોરિયા લાંબા સમયથી આ સંયુક્ત સૈન્ય અભ્યાસને પોતાની વિરુદ્ધ યુદ્ધની તૈયારી ગણાવે છે. પ્રશ્ન એ રહે છે કે કિમ ટ્રમ્પની પહેલ પર કેવી પ્રતિક્રિયા આપશે. રશિયા સાથે ઉત્તર કોરિયાના વધતા જતા રાજદ્વારી, આર્થિક અને સૈન્ય સંબંધો અને ચીન સાથેના સારા સંબંધોને કારણે ઉત્તર કોરિયાની યુનાઇટેડ સ્ટેટ્સ પરની નિર્ભરતા ઓછી થઈ છે.
