શુક્રવારે, મ્યાનમારના સેન્ટ્રલ સાગાંગ વિસ્તારમાં સેનાના હવાઈ હુમલામાં બૌદ્ધ મઠમાં ધ્યાન કરતા 14 લોકો માર્યા ગયા અને 20 અન્ય ઘાયલ થયા. વિપક્ષી જૂથ અને સ્થાનિક રહેવાસીના જણાવ્યા અનુસાર, માયિંગ ટાઉનશિપના સ્વાલે લે ઓહ ગામમાં સવારે 9 વાગ્યાની આસપાસ હુમલો થયો હતો. આ ગામ દેશના બીજા સૌથી મોટા શહેર મંડલેથી લગભગ 75 કિલોમીટર પશ્ચિમમાં આવેલું છે. હુમલા સમયે મોટી સંખ્યામાં લોકો આશ્રમ સંકુલમાં એક અઠવાડિયા લાંબી ધ્યાન શિબિરમાં ભાગ લઈ રહ્યા હતા. મૃતકોમાં ત્રણ મહિલાઓ પણ સામેલ છે. સ્થાનિક લોકોના જણાવ્યા અનુસાર, આ હુમલાથી સમગ્ર વિસ્તારમાં ગભરાટ ફેલાઈ ગયો હતો અને લોકોએ પોતાનો જીવ બચાવવા માટે સુરક્ષિત સ્થળો તરફ ભાગવું પડ્યું હતું.
સિવિલ ડિફેન્સ એન્ડ સિક્યુરિટી ઓર્ગેનાઈઝેશન ઓફ મ્યાઈંગ ટાઉનશીપના પ્રવક્તા ન્વે ઓએ જણાવ્યું હતું કે મ્યાનમાર આર્મીના ફાઈટર પ્લેને આશ્રમ સંકુલ પર બોમ્બ ફેંક્યો હતો. તેમના જણાવ્યા અનુસાર હુમલામાં 14 લોકોના મોત થયા હતા અને 20 લોકો ઘાયલ થયા હતા. એક સ્થાનિક રહેવાસીએ પણ મૃત્યુઆંકની પુષ્ટિ કરી છે. તેમણે કહ્યું કે ફાઈટર પ્લેને લગભગ 15 મિનિટના અંતરાલમાં બે બોમ્બ ફેંક્યા. બીજો બોમ્બ મઠની નજીક સ્થિત એક ઘર પર પડ્યો હતો, જેના કારણે ત્યાં પણ ભારે નુકસાન થયું હતું. જ્યારે હુમલો થયો ત્યારે 100 થી વધુ લોકો મઠ સંકુલમાં એક અઠવાડિયાના ધ્યાન કાર્યક્રમમાં ભાગ લઈ રહ્યા હતા. આ કાર્યક્રમનું આયોજન બૌદ્ધ લેન્ટ સમયગાળા દરમિયાન કરવામાં આવ્યું હતું.
ઘટના બાદ વિસ્તારમાં અફરા-તફરી મચી ગઈ હતી
એક સ્થાનિક રહેવાસીએ જણાવ્યું કે હુમલામાં તેના એક સંબંધીનું પણ મોત થયું છે. ઘટના બાદ વિસ્તારમાં અફરા-તફરી મચી ગઈ હતી અને લોકોએ ઘાયલોને સલામત સ્થળે લઈ જવાનો પ્રયાસ કર્યો હતો. મૃતકોના મૃતદેહોને દફનાવ્યા પછી, ઘણા લોકો નજીકના સમુદાયોમાં ગયા. હવાઈ હુમલા બાદ સમગ્ર ગામમાં ભયનો માહોલ છે. જો કે આ હુમલા અંગે મ્યાનમારની સૈન્ય સરકાર તરફથી તાત્કાલિક કોઈ પ્રતિક્રિયા આપવામાં આવી નથી. વિપક્ષી જૂથોનો આરોપ છે કે સેના એવા વિસ્તારોમાં સતત હવાઈ હુમલા કરી રહી છે જ્યાં લોકશાહી તરફી સશસ્ત્ર સંગઠનો અને વંશીય સશસ્ત્ર જૂથો સક્રિય છે.
