નેપાળના વડા પ્રધાન બલેન શાહે વિનાશક પૂરમાં સમયસર મદદ કરવા બદલ ભારત અને ચીનનો આભાર માન્યો છે. આ દુર્ઘટનામાં અત્યાર સુધીમાં 1100થી વધુ લોકોના મોત થયા છે, જ્યારે ચાર હજારથી વધુ લોકો હજુ પણ લાપતા છે. નેપાળની સેના અને અન્ય ડિઝાસ્ટર વિભાગો 26 ઓગસ્ટથી બચાવ કાર્ય ચલાવી રહ્યા છે.
નેપાળની સંસદમાં બોલતા બલેન શાહે કહ્યું કે આટલી મોટી દુર્ઘટનામાં આંતરરાષ્ટ્રીય મદદ લેવાનો ઈન્કાર કરવાનો કોઈ પ્રશ્ન જ નથી. તેમણે કહ્યું કે નેપાળે ખાનગી ક્ષેત્રમાં સમયસર મદદ મેળવવા માટે દેશો સાથે સંકલન કર્યું હતું. “અમારા મિત્ર દેશો, ચીન અને ભારતે, ટેકનિશિયન મોકલ્યા. પ્રથમ દિવસથી તેઓએ વિસ્તારને થયેલા નુકસાનનું મૂલ્યાંકન કરવા અને પ્રવેશ શક્ય છે કે કેમ તે નક્કી કરવા માટે હવાઈ જાસૂસી સહિતની તપાસ હાથ ધરી,” તેમણે કહ્યું.
તેમણે વધુમાં કહ્યું કે ભારતીય ટેકનિશિયન દૂરના વિસ્તારોમાં જલદી પહોંચી ગયા. બલેન શાહે જણાવ્યું હતું કે, “તે એકદમ અલગ પરિસ્થિતિ હતી. તે જગ્યાએ એટલી બધી કાદવ અને ગંદકી હતી કે માત્ર ખોદનારાઓને જ નહીં પરંતુ સેના અને સશસ્ત્ર પોલીસ દળોના લોકોને પણ ઊભા રહેવાની જગ્યા મળી ન હતી.”
લોકોને બચાવવા એ અમારી પ્રાથમિકતા છેઃ બલેન શાહ
બલેન શાહે રાસુવા અને નુવાકોટમાં આવેલા ભયાનક પૂર અંગે સરકારના પ્રતિભાવ વિશે માહિતી આપતાં જણાવ્યું હતું કે લોકોને બચાવવા સૌથી વધુ જરૂરી છે. શાહે કહ્યું, “આ મુશ્કેલ સમયમાં અમે રાષ્ટ્રની સાથે છીએ. આ ઘટના સવારે 8:30 વાગ્યાની આસપાસ બની હતી. અમને આ ઘટના વિશે જાણ થતાં જ અમે અમારી ટીમોને એલર્ટ કરી દીધી હતી. સવારે 9:15 વાગ્યે એક મીટિંગ બોલાવવામાં આવી હતી. હેલિકોપ્ટરને સ્ટેન્ડબાય પર રાખવામાં આવ્યા હતા. સવારે 10:30 વાગ્યે અમારી ઇમરજન્સી રેસ્ક્યૂ ટીમો તૈનાત કરવા માટે તૈયાર હતી. લોકોને બચાવી રહ્યા હતા.” તેમણે કહ્યું કે સેનાના હેલિકોપ્ટરને અસરગ્રસ્ત વિસ્તારોમાં બચાવ કામગીરી કરવા માટે નિર્દેશ આપવામાં આવ્યો છે. “બપોરે 1 વાગ્યાની આસપાસ, અમે સ્થાનિક સાંસદ અને ધારાસભ્યનો સંપર્ક કરી શક્યા,” તેમણે કહ્યું.
