પાકિસ્તાનની ફેડરલ ઇન્વેસ્ટિગેશન એજન્સી (FIA)એ 2026ના મોસ્ટ વોન્ટેડ આતંકવાદીઓની નવી યાદી જાહેર કરી છે.જેમાં જૈશ-એ-મોહમ્મદના વડા મસૂદ અઝહરનું નામ પણ સામેલ છે. FIAએ અઝહર પર જાહેર કરાયેલ ઈનામમાં 20 લાખ પાકિસ્તાની રૂપિયા વધારીને 70 લાખ રૂપિયા કરી દીધા છે. સૂત્રોના જણાવ્યા અનુસાર આ પગલું ઓક્ટોબરમાં યોજાનારી ફાઈનાન્સિયલ એક્શન ટાસ્ક ફોર્સ (FTF)ની બેઠક પહેલા લેવામાં આવ્યું છે. પાકિસ્તાનને ફરીથી ગ્રે લિસ્ટમાં સામેલ થવાના ખતરાને રોકવા માટે તે આંતરરાષ્ટ્રીય સ્તરે આતંકવાદીઓ વિરુદ્ધ કાર્યવાહી બતાવવાનો પ્રયાસ કરી રહ્યું છે. ભારતીય સૂત્રોનું કહેવું છે કે અઝહરને યાદીમાં મૂકવો એ માત્ર દેખાડો હોઈ શકે છે.
પાકિસ્તાન 2021 થી દાવો કરી રહ્યું છે કે મસૂદ અઝહર તેના દેશમાં નથી અને અફઘાનિસ્તાન ભાગી ગયો છે. તે જ વર્ષે FIAએ તેના પર 50 લાખ પાકિસ્તાની રૂપિયાનું ઈનામ રાખ્યું હતું. હવે 5 વર્ષ બાદ આ રકમ વધારીને 70 લાખ રૂપિયા કરવામાં આવી છે. અઝહરને 14 ફેબ્રુઆરી 2019ના પુલવામા હુમલા સહિત ભારતમાં ઘણા આતંકવાદી હુમલાનો માસ્ટરમાઈન્ડ માનવામાં આવે છે. ભારતીય ગુપ્તચર એજન્સીઓના છેલ્લા છ મહિનાના ટેકનિકલ વિશ્લેષણ મુજબ, અઝહર અફઘાનિસ્તાનમાં નહીં પરંતુ પાકિસ્તાનના સિંધ પ્રાંતના નવાબશાહ શહેરમાં છુપાયેલો છે. FIAની નવી રેડ બુકમાં 26/11ના મુંબઈ હુમલા સાથે જોડાયેલા 19 આતંકવાદીઓના નામ પણ છે. આમાં એવા લોકોનો સમાવેશ થાય છે જેમણે હુમલાખોરોને મદદ કરી હતી, તેમને પૈસા આપ્યા હતા અથવા બોટની વ્યવસ્થા કરી હતી.
26/11 સાથે સંબંધિત 17 આતંકવાદીઓના નામ
સૂત્રોના જણાવ્યા અનુસાર 26/11 સાથે જોડાયેલા 17 આતંકવાદીઓના નામ તસવીરો અને તેમની ભૂમિકાઓ સાથે યાદીમાં છે. બે લોકોના કિસ્સામાં, ફોટોગ્રાફ્સ, લશ્કર-એ-તૈયબા સાથેના તેમના કનેક્શન અને તેમની ભૂમિકા વિશેની માહિતી દૂર કરવામાં આવી છે. આમાં તુર્બતના મુહમ્મદ ખાનનું નામ છે, જેણે હુમલાખોરોને મુંબઈ લઈ જવા માટે અલ-હુસૈની બોટ આપી હતી. એ જ રીતે બહાવલનગરના અબ્દુલ રહેમાનનો ફોટો અને લશ્કર સાથેનું તેનું કનેક્શન હટાવી દેવામાં આવ્યું છે.
