કોંગો પ્લેન ક્રેશ: કોંગોમાં એક વિમાન દુર્ઘટનામાં ઓછામાં ઓછા 14 લોકોએ જીવ ગુમાવ્યા છે. મૃતકોમાં સેનાના બે વરિષ્ઠ અધિકારીઓ પણ સામેલ છે. આમાં લશ્કરી અદાલતના વડા, લેફ્ટનન્ટ જનરલ મુતોમ્બો કટાલયી તિઆન્ડે અને સશસ્ત્ર દળોના ઓડિટર જનરલ, લેફ્ટનન્ટ જનરલ બકુમી લિકુલ્યાનો સમાવેશ થાય છે.
કોંગી સેનાના પ્રવક્તા મેજર જનરલ ઈફોમી એકેન્ગેએ જણાવ્યું હતું કે બે વરિષ્ઠ અધિકારીઓ સિવાય પ્રતિનિધિમંડળના 12 સભ્યો અને પ્લેનના ક્રૂ મેમ્બર્સ પણ દુર્ઘટનામાં માર્યા ગયા હતા.
વિમાન કિકવિટથી કિંશાસા પરત ફરી રહ્યું હતું.
સ્થાનિક અધિકારીઓના જણાવ્યા અનુસાર, વિમાન દક્ષિણ-પશ્ચિમ શહેર કિકવિટથી રાજધાની કિંશાસા પરત ફરી રહ્યું હતું. આ દરમિયાન પ્લેનમાં ટેક્નિકલ ખામી સર્જાઈ હતી અને તે કેંગે વિસ્તારમાં ક્રેશ થઈ ગયું હતું. આ દુર્ઘટનામાં વિમાનમાં સવાર તમામ લોકોના મોત થયા હતા.
સેનાના પ્રવક્તા એકેંગેએ જણાવ્યું કે દુર્ઘટનાનું સાચું કારણ જાણવા માટે તપાસ શરૂ કરવામાં આવી છે. અત્યારે એ સ્પષ્ટ નથી થયું કે પ્લેનમાં કઈ પ્રકારની ટેકનિકલ સમસ્યા સર્જાઈ હતી.
કોંગોની સેના ઘણા બળવાખોર જૂથો સાથે લડી રહી છે
સિવિલ એવિએશન ઓથોરિટી બોર્ડના અધ્યક્ષ ટ્રાયફોન કિન-કી મુલુમ્બાએ પણ કહ્યું કે પ્લેન ક્રેશનું કારણ હજુ સુધી બહાર આવ્યું નથી. અધિકારીઓની તપાસ બાદ જ અકસ્માતના કારણ અંગે સાચી માહિતી જાણી શકાશે.
કોંગી સૈન્ય ગયા વર્ષથી દેશમાં કાર્યરત ઘણા બળવાખોર જૂથો સામે અભિયાન ચલાવી રહ્યું છે. આમાં પૂર્વીય કોંગોમાં કાર્યરત રવાન્ડા સમર્થિત M23 બળવાખોર જૂથનો પણ સમાવેશ થાય છે. આ બળવાખોર જૂથોએ તાજેતરના સમયમાં ઘણા મહત્વપૂર્ણ શહેરો પર કબજો કરી લીધો હતો.
આ પણ વાંચો- કાશ્મીર, ઓપરેશન સિંદૂરથી લઈને સિંધુ જળ સંધિ સુધી… શાહબાઝ શરીફે ફરીથી યુએનજીએમાં જૂની ધૂન વગાડી, વીડિયો
