2100 ડ્રાઈવર સમકક્ષ જ્યારે કંડક્ટર વર્ગમાં 1300 જગ્યાઓ પર ભરતી કરવામાં આવશે.
(જીએનએસ), 24
નોકરી મેળવવા ઇચ્છુક લોકો માટે ખુબ જ સારા સમાચાર સામે આવ્યા છે. ગુજરાત એસ.ટી વિભાગમાં વિવિધ જગ્યાઓ માટે 3400 થી વધુ ભરતી કરવામાં આવશે. એસટી બસમાં ડ્રાઈવર સમકક્ષની 2100 જગ્યાઓ પર ભરતી કરવામાં આવશે, જ્યારે કંડક્ટર વર્ગ માટે 1300 જગ્યાઓ પર ભરતી કરવામાં આવશે. એટલું જ નહીં ગુજરાત એસટી વિભાગમાં મિકેનિકની પણ ભરતી કરવામાં આવશે.
ગુજરાત એસટી વિભાગમાં મોટા પાયે ભરતી માટે આગામી દિવસોમાં જાહેરનામું બહાર પાડવામાં આવશે. ગૃહ રાજ્ય મંત્રી હર્ષ સંઘવીએ ટ્વીટ કર્યું છે કે ચાલુ નાણાકીય વર્ષ 2023-24માં એસટી નિગમ ડ્રાઈવર વર્ગ માટે 2100, કંડક્ટર વર્ગ માટે 1300 અને મિકેનિક વર્ગ માટે 1300 ઉમેદવારોની ભરતી કરવા જઈ રહ્યું છે. જેની જાહેરાત ટૂંક સમયમાં કરવામાં આવશે.
અગાઉ, ગૌણ સેવા પસંદગી બોર્ડના સચિવ હસમુખ પટેલે માહિતી આપી હતી કે ટૂંક સમયમાં ગુજરાતમાં 500 કે 1000 નહીં પણ 6000 જગ્યાઓ માટે બમ્પર ભરતી કરવામાં આવશે. હસમુખ પટેલે જણાવ્યું હતું કે, મહેસૂલ વિભાગ હેઠળ ક્લાર્ક, હેડ ક્લાર્ક, જુનિયર ક્લાર્કની ખાલી જગ્યાઓ ભરવામાં આવશે. આ માટે સપ્ટેમ્બર મહિનામાં પ્રિલિમિનરી પરીક્ષા લેવામાં આવી શકે છે. સૌથી મહત્વની વાત એ છે કે આ પરીક્ષા નવી પરીક્ષા પેટર્ન મુજબ લેવામાં આવશે.
મહત્વનું છે કે ગુજરાત સરકારે વર્ગ 3 ની ભરતી માટે નવા નિયમો જાહેર કર્યા છે. સરકારી વર્ગ 3 ની ભરતી પરીક્ષા પેટર્નમાં મોટા ફેરફારો કરવામાં આવ્યા છે. રાજ્ય સરકારે હેડ ક્લાર્ક, સિનિયર ક્લાર્ક અને જુનિયર ક્લાર્કની ભરતી પરીક્ષા માટે નવા નિયમો જાહેર કર્યા છે. પરીક્ષા બે તબક્કામાં લેવામાં આવશે. પ્રથમ તબક્કો પ્રારંભિક પરીક્ષાનો અને બીજો તબક્કો મુખ્ય પરીક્ષાનો રહેશે.