ICC મહિલા ક્રિકેટ વર્લ્ડ કપ અપડેટેડ પોઈન્ટ ટેબલ- હરમનપ્રીત કૌરની આગેવાની હેઠળની ટીમ ઈન્ડિયાને રવિવારે 19 ઓક્ટોબરે રાત્રે ICC મહિલા ક્રિકેટ વર્લ્ડ કપ 2025ની 20મી મેચમાં ઈંગ્લેન્ડના હાથે હારનો સામનો કરવો પડ્યો હતો. આ હાર સાથે ભારતે ટૂર્નામેન્ટમાં પરાજયની હેટ્રિક નોંધાવી છે. આ હારને કારણે ભારત ટોપ-4માંથી બહાર થવાની અણી પર છે. ભારત સામે 4 રને જીત મેળવીને ઈંગ્લેન્ડ વર્લ્ડ કપ સેમિફાઈનલમાં પહોંચનારી ત્રીજી ટીમ બની ગઈ છે. તેમના પહેલા ઓસ્ટ્રેલિયા અને દક્ષિણ આફ્રિકાને નોકઆઉટ રાઉન્ડ માટે ટિકિટ મળી હતી. ઇંગ્લેન્ડે દક્ષિણ આફ્રિકાને હરાવીને ટોપ-2માં પોતાનું સ્થાન બનાવી લીધું છે.
ભારતીય મહિલા ટીમની 5 મેચોમાં આ સતત ત્રીજી હાર છે અને ટીમ ઈન્ડિયા મહિલા વર્લ્ડ કપના પોઈન્ટ ટેબલમાં 4 પોઈન્ટ સાથે ચોથા સ્થાન પર છે. હવે સેમીફાઈનલ માટે માત્ર એક ટીમની જગ્યા ખાલી છે અને ભારત સિવાય ન્યુઝીલેન્ડ પણ રેસમાં છે. મહિલા વિશ્વ કપ 2025માં ભારત અને ન્યુઝીલેન્ડ વચ્ચેની આગામી મેચ 23 ઓક્ટોબરે છે, આ મેચ વર્ચ્યુઅલ ક્વાર્ટર ફાઈનલ તરીકે રમાશે કારણ કે આ મેચ જીતનારી ટીમને સેમિફાઈનલની ટિકિટ મળવાની સૌથી વધુ તકો હશે.
જો આપણે વર્તમાન પોઈન્ટ ટેબલ પર નજર કરીએ તો ઓસ્ટ્રેલિયા અને ઈંગ્લેન્ડ 9 પોઈન્ટ સાથે ટોપ-2માં છે. ટુર્નામેન્ટમાં હજુ સુધી આ બંને ટીમોને કોઈ હરાવી શક્યું નથી. જ્યારે દક્ષિણ આફ્રિકા 8 પોઈન્ટ સાથે ત્રીજા સ્થાને અને ભારત ચોથા સ્થાને છે.
