ભારતીય મહિલા ક્રિકેટ ટીમની વાઈસ કેપ્ટન અને સ્ટાર ઓપનર સ્મૃતિ મંધાનાએ ગુરુવારે ન્યૂઝીલેન્ડ સામે વર્લ્ડ કપ મેચમાં શાનદાર સદી ફટકારી હતી. આ સાથે તેણે ODI ક્રિકેટમાં એક કેલેન્ડર વર્ષમાં સૌથી વધુ સદી ફટકારવાના વર્લ્ડ રેકોર્ડની બરાબરી કરી લીધી છે. મંધાનાએ 2025માં તેની પાંચમી ODI સદી ફટકારીને આ ઐતિહાસિક સિદ્ધિ હાંસલ કરી હતી. મંધાના સદી ફટકાર્યા બાદ વધુ સમય સુધી ક્રિઝ પર રહી શકી ન હતી અને 95 બોલમાં 109 રન બનાવીને પેવેલિયન પરત ફરી હતી.
એક કેલેન્ડર વર્ષમાં તેની 5મી સદી ફટકારીને, સ્મૃતિ મંધાનાએ દક્ષિણ આફ્રિકાની તઝમીન બ્રિટ્સના રેકોર્ડની બરોબરી કરી, જેણે તે જ વર્ષે (2025)માં 5 સદી ફટકારી હતી. મંધાનાએ ગયા વર્ષે (2024) પણ 4 સદી ફટકારી હતી, જે તે સમયે એક કેલેન્ડર વર્ષમાં સૌથી વધુ સદીનો રેકોર્ડ હતો.
ન્યુઝીલેન્ડ સામેની સદી સાથે મંધાનાએ તેની ODI કારકિર્દીમાં કુલ 14 સદી પૂરી કરી છે. તે હવે ઓસ્ટ્રેલિયાની મહાન બેટ્સમેન મેગ લેનિંગના 15 સદીના વર્લ્ડ રેકોર્ડથી માત્ર એક સદી દૂર છે. વનડેમાં ન્યુઝીલેન્ડની સુઝી બેટ્સે 13 સદી, ટેમી બ્યુમોન્ટે 12 અને સિવર બ્રન્ટે 10 સદી ફટકારી છે.
સ્મૃતિ મંધાના ICC મહિલા ODI વર્લ્ડ કપમાં સૌથી વધુ રન બનાવનારી ખેલાડી બની ગઈ છે. મંધાનાએ 6 મેચમાં 55.17ની એવરેજથી 331 રન બનાવ્યા છે. પ્રતિકા રાવલે પણ 300 થી વધુ રન બનાવ્યા છે અને મહિલા વર્લ્ડ કપ 2025માં તે બીજા સૌથી વધુ રન બનાવનાર ખેલાડી બની ગઈ છે. ભારતની ઓપનિંગ બેટ્સમેન સ્મૃતિ મંધાના અને રાવલ વચ્ચે પ્રથમ વિકેટ માટે 212 રનની ભાગીદારી થઈ હતી. સ્મૃતિ મંધાનાએ પોતાની ઇનિંગમાં 95 બોલમાં 109 રન બનાવ્યા હતા. તેણે ચાર સિક્સર અને 10 ફોર ફટકારી હતી. ભારત તરફથી પ્રતિકા રાવલે સૌથી વધુ 122 રન બનાવ્યા હતા.
