WTC 2027 પોઈન્ટ ટેબલ: દક્ષિણ આફ્રિકાએ પાકિસ્તાન સામેની રાવલપિંડી ટેસ્ટ ચોથા દિવસે જ 8 વિકેટે જીતી લીધી. જીતવા માટે તેની પાસે ચોથી ઇનિંગમાં 73 રનનો ટાર્ગેટ હતો જે તેણે માત્ર 2 વિકેટ ગુમાવીને હાંસલ કરી લીધો હતો. આ રીતે દક્ષિણ આફ્રિકાએ 18 વર્ષ બાદ પાકિસ્તાનમાં ટેસ્ટ મેચ જીતી છે. આ જીત સાથે વર્લ્ડ ટેસ્ટ ચેમ્પિયનશિપ (WTC)ના પોઈન્ટ ટેબલમાં ઘણા ફેરફારો થયા છે. ભારતને ફાયદો થયો છે અને પાકિસ્તાન સીધા બીજાથી ચોથા સ્થાને આવી ગયું છે.
બીજી ટેસ્ટમાં જીત સાથે દક્ષિણ આફ્રિકાની ટીમ 2 ટેસ્ટ મેચની શ્રેણી 1-1થી બરાબર કરવામાં સફળ રહી છે. તેને શ્રેણીની પ્રથમ ટેસ્ટમાં હારનો સામનો કરવો પડ્યો હતો.
દક્ષિણ આફ્રિકા પાંચમાં સ્થાને, પાકિસ્તાન ચોથા સ્થાને પહોંચી ગયું છે.
પાકિસ્તાનને WTC પોઈન્ટ ટેબલમાં રાવલપિંડી ટેસ્ટમાં હારની કિંમત ચૂકવવી પડી હતી. અગાઉ પાકિસ્તાની ટીમ ઓસ્ટ્રેલિયા પછી બીજા સ્થાને હતી પરંતુ ગુરુવારની હાર બાદ તે ચોથા સ્થાને સરકી ગઈ છે. પાકિસ્તાને વર્તમાન WTC ચક્ર 2025-27માં 2 ટેસ્ટ રમી છે, જેમાંથી તેણે એકમાં જીત મેળવી છે અને 1માં હારનો સામનો કરવો પડ્યો છે. આ રીતે, તે 12 પોઈન્ટ અને 50 ટકાની જીતની ટકાવારી સાથે ચોથા સ્થાને છે. રાવલપિંડીમાં જીત સાથે, સાઉથ આફ્રિકા પોઈન્ટ ટેબલમાં પાકિસ્તાનથી બરાબર નીચે પાંચમા સ્થાને પહોંચી ગયું છે. વર્તમાન ચક્રમાં તેણે અત્યાર સુધીમાં 2 ટેસ્ટ રમી છે. જેમાંથી એક જીતી છે અને એક હાર છે. આ રીતે, તે 12 પોઈન્ટ અને 50 ની જીતની ટકાવારી સાથે પાંચમા સ્થાને છે.
ઓસ્ટ્રેલિયાનો દબદબો
WTC પોઈન્ટ ટેબલમાં ઓસ્ટ્રેલિયાની ટીમ ટોપ પર છે. તેણે અત્યાર સુધી રમાયેલી ત્રણેય ટેસ્ટ જીતી છે અને તેની જીતની ટકાવારી 100 છે. ઓસ્ટ્રેલિયાના 36 પોઈન્ટ છે.
