પટના: બિહારની રાજનીતિમાં લાલુ પરિવાર વચ્ચે ટકરાવની ચર્ચા છે. પૂર્વ મંત્રી તેજ પ્રતાપ યાદવે શુક્રવારે પીટીઆઈને આપેલા ઈન્ટરવ્યુમાં સ્પષ્ટપણે કહ્યું કે તેઓ રાષ્ટ્રીય જનતા દળ (આરજેડી)માં પાછા ફરવા તૈયાર નથી. તેમણે સ્પષ્ટ કહ્યું કે આરજેડીમાં પાછા ફરવા કરતાં મોતને ગળે લગાવવું વધુ સારું છે.
થોડા મહિના પહેલા તેમના પિતા લાલુ પ્રસાદ યાદવ દ્વારા પાર્ટીમાંથી હાંકી કાઢવામાં આવ્યા બાદ તેમણે પોતાની નવી રાજકીય ઓળખ ‘જન શક્તિ જનતા દળ (JJD) બનાવી છે. હવે આ પાર્ટીના બેનર હેઠળ તેઓ વૈશાલી જિલ્લાની મહુઆ વિધાનસભા બેઠક પરથી ચૂંટણી લડી રહ્યા છે, જ્યાંથી તેમણે 2015માં રાજકીય સફર શરૂ કરી હતી.
તેણે કહ્યું કે તે તેજસ્વીથી નારાજ નથી. તે મારો નાનો ભાઈ છે, તેને હંમેશા મારા આશીર્વાદ મળશે. હું તેમના પર સુદર્શન ચક્ર ચલાવી શકતો નથી. તેજ પ્રતાપે કહ્યું કે તેમણે તેમના નોમિનેશન ફોર્મમાં તેમની દાદી મરીચિયા દેવીનો ફોટો સામેલ કર્યો છે. તેમણે કહ્યું કે, મારા પિતાને રાજનીતિમાં તેમના આશીર્વાદ મળ્યા હતા.
તેજ પ્રતાપનું આ નિવેદન બિહાર વિધાનસભા ચૂંટણી 2025 માટે એક મોટો વળાંક સાબિત થઈ શકે છે. મહુઆ આરજેડીનો પરંપરાગત ગઢ રહ્યો છે, જ્યાંથી વર્તમાન ધારાસભ્ય મુકેશ કુમાર સૌરભ છે. તેજ પ્રતાપની એન્ટ્રી સાથે અહીં ત્રિકોણીય હરીફાઈ સર્જાઈ છે, જે ન માત્ર પારિવારિક ઝઘડાને ઉજાગર કરી રહી છે પરંતુ વિપક્ષની એકતા પર પણ સવાલો ઉભા કરી રહી છે. તેમણે ઈન્ટરવ્યુમાં કહ્યું હતું કે, “હું સત્તાના ભૂખ્યા રાજકારણનો ભાગ નથી. મારા માટે સિદ્ધાંતો અને આત્મસન્માન સર્વોપરી છે. હું જનતાના હિતમાં કામ કરું છું અને જનતા મારા પર વિશ્વાસ કરે છે.” તેજ પ્રતાપે દાવો કર્યો હતો કે તેમનો મહુઆની જમીન સાથે ઊંડો સંબંધ છે અને સ્થાનિક લોકો તેમના સમય દરમિયાન સમસ્યાઓનું નિરાકરણ યાદ કરે છે.
તેજ પ્રતાપને જૂન 2025માં RJDમાંથી છ વર્ષ માટે હાંકી કાઢવામાં આવ્યા હતા. તેનું કારણ એક ફેસબુક પોસ્ટ હતી, જેમાં તેણે પોતાના અંગત જીવન સાથે સંબંધિત વિવાદાસ્પદ નિવેદનો આપ્યા હતા. અનુષ્કા સિંહના લગ્નના વિવાદ પછી પરિવાર અને પાર્ટીથી અંતર વધી ગયું, ત્યારપછી તેઓએ ‘ટીમ તેજ પ્રતાપ’ તરીકે શરૂઆત કરી. સપ્ટેમ્બર 2025 માં, તેમણે ઔપચારિક રીતે જનશક્તિ જનતા દળ (JJD) ની સ્થાપના કરી, જેનું ચૂંટણી પ્રતીક ‘બ્લેક બોર્ડ’ છે.
