ફરહાન અખ્તરની આગામી ફિલ્મ ‘120 બહાદુર’ વિવાદમાં આવી ગઈ છે. આ ફિલ્મ 1962માં ભારત અને ચીન વચ્ચે થયેલા યુદ્ધ પર આધારિત છે. ફિલ્મના વિરોધમાં, આહીર સમુદાયના સેંકડો લોકોએ રવિવારે ગુરુગ્રામમાં નેશનલ હાઈવે 48 પર પગપાળા કૂચ કરી હતી અને રસ્તો રોકીને પોતાનો વિરોધ વ્યક્ત કર્યો હતો. આહીર સમાજ આ ફિલ્મનું નામ બદલીને ‘120 બહાદુર’ને બદલે ‘120 વીર આહિર’ કરવાની માંગ કરી રહ્યો છે. જો ફિલ્મનું નામ નહીં બદલાય તો ફિલ્મને રિલીઝ નહીં થવા દેવાની પણ સમાજના લોકોએ ચીમકી આપી છે. રવિવારે આ વિરોધને કારણે NH-48 પર એક કિલોમીટરથી વધુ જામ થઈ ગયો હતો.
યુનાઈટેડ આહીર રેજિમેન્ટ મોરચાએ તેમના વિરોધ અંગે નિવેદન જારી કરીને જણાવ્યું હતું કે, ‘વિરોધ દરમિયાન, વિરોધીઓ ખેડકી દૌલા ટોલ પ્લાઝાથી દિલ્હી સરહદ સુધી પગપાળા ચાલીને ગયા હતા. તેમની માંગ છે કે 1962ના ભારત-ચીન યુદ્ધ પર આધારિત આ ફિલ્મનું નામ બદલીને ‘120 વીર આહિર’ કરવામાં આવે.
મોરચાનો આરોપ છે કે આવતા મહિને રિલીઝ થનારી ફિલ્મમાં 13મી કુમાઉ રેજિમેન્ટના 120 આહીર સૈનિકોના બલિદાનને પૂરતા પ્રમાણમાં દર્શાવવામાં આવ્યું નથી. તેમણે કહ્યું કે આ એ જ સૈનિકો હતા જેમણે 1962ના યુદ્ધમાં ચીનની પીએલએ (પીપલ્સ લિબરેશન આર્મી) સામે લડતી વખતે લદ્દાખના રેઝાંગ લાના વ્યૂહાત્મક પર્વત માર્ગની રક્ષા કરી હતી.
આ અંગે માહિતી આપતાં આહીર મોરચાના સભ્ય અને વકીલ સુબે સિંહ યાદવે જણાવ્યું હતું કે, ‘ફિલ્મનું નામ બદલવું જોઈએ, નહીં તો અમે આ ફિલ્મને હરિયાણામાં અને જ્યાં અમારો સમુદાય રહે છે ત્યાં રિલીઝ થવા દઈશું નહીં.’ તેમણે વધુમાં કહ્યું, ‘જો ફિલ્મનું નામ બદલીને ‘120 વીર આહિર’ નહીં કરવામાં આવે તો અમે રાજ્યમાં ફિલ્મ પર પ્રતિબંધ મૂકવા માટે મુખ્યમંત્રી નયબ સિંહ સૈનીને મળીશું.’
પોતાની વાત ચાલુ રાખતા તેમણે કહ્યું કે આ મામલે સુપ્રીમ કોર્ટમાં અરજી દાખલ કરવા માટે ડ્રાફ્ટ તૈયાર કરવામાં આવી રહ્યો છે. રેજાંગ-લાના યુદ્ધમાં ભારતીય સેનાના 120 સૈનિકોએ લગભગ 3 હજાર ચીની સૈનિકોને મારી નાખ્યા હતા. આ તમામ 120 સૈનિકો આહીર (યાદવ) સમુદાયના હતા.
વિરોધની માહિતી આપતાં તેમણે કહ્યું કે, ‘આ વિરોધ માર્ચ સવારે સાડા અગિયાર વાગ્યે આહીર રેજિમેન્ટના વિરોધ સ્થળથી શરૂ થઈ હતી. આ અંદાજે 19 કિલોમીટર લાંબી મુસાફરી દિલ્હી-જયપુર હાઈવે પરથી પસાર થઈ અને સાંજે 4 વાગ્યે દિલ્હી-ગુડગાંવ બોર્ડર પર સરહૌલ ટોલ ટેક્સ પર પહોંચી, જ્યાં તે સમાપ્ત થઈ. આ યાત્રા દરમિયાન પગપાળા લોકોની સાથે લોકો પણ વાહનો અને ટ્રેક્ટર સાથે આ યાત્રામાં જોડાયા હતા.
