ICC મીટિંગ 2029 વુમન્સ વર્લ્ડ કપ: ઇન્ટરનેશનલ ક્રિકેટ કાઉન્સિલ (ICC) એ મહિલા ક્રિકેટને નવી ઉંચાઈઓ પર લઈ જવા માટે ઐતિહાસિક નિર્ણય લીધો છે. તાજેતરમાં યોજાયેલી ICC બોર્ડની બેઠકમાં નિર્ણય લેવામાં આવ્યો હતો કે હવે 2029ના મહિલા વનડે વર્લ્ડ કપમાં 8ની જગ્યાએ 10 ટીમો ભાગ લેશે. મહિલા ક્રિકેટની વધતી જતી લોકપ્રિયતા અને 2025 વર્લ્ડ કપની શાનદાર સફળતાને ધ્યાનમાં રાખીને આ નિર્ણય લેવામાં આવ્યો છે.
મહિલા ક્રિકેટે છેલ્લા કેટલાક વર્ષોમાં અભૂતપૂર્વ પ્રગતિ કરી છે. ભારત, ઓસ્ટ્રેલિયા અને ઈંગ્લેન્ડ જેવી મજબૂત ટીમો તેમજ ઘણા સહયોગી દેશોએ તેમના રમતના સ્તરમાં ઝડપથી સુધારો કર્યો છે. ICCના આ પગલાથી આ ઉભરતી ટીમોને આંતરરાષ્ટ્રીય મંચ પર તક મળશે, જે વૈશ્વિક સ્તરે મહિલા ક્રિકેટને નવી ઓળખ આપશે.
ICCએ કહ્યું કે મહિલા વર્લ્ડ કપ 2025એ દર્શકોની સંખ્યાનો રેકોર્ડ તોડ્યો હતો. સ્ટેડિયમમાં લગભગ 3 લાખ દર્શકો હાજર હતા, જ્યારે વિશ્વભરના કરોડો ચાહકોએ ટીવી અને ડિજિટલ પ્લેટફોર્મ દ્વારા ટૂર્નામેન્ટની મજા માણી હતી. એકલા ભારતમાં જ લગભગ 50 કરોડ દર્શકોએ વર્લ્ડ કપની મેચો જોઈ. આ અભૂતપૂર્વ સફળતા બાદ જ ટીમોની સંખ્યા વધારવાનો નિર્ણય લેવામાં આવ્યો છે.
આ નવો ફેરફાર 2029ના મહિલા ODI વર્લ્ડ કપથી અમલમાં આવશે. ટીમોની સંખ્યા વધવાથી ટુર્નામેન્ટ વધુ રોમાંચક અને સ્પર્ધાત્મક બનશે. ઉપરાંત, આ નિર્ણય મહિલા ક્રિકેટને નવા દેશોમાં લઈ જવા અને રમતનો વ્યાપ વધારવા માટે સીમાચિહ્નરૂપ સાબિત થશે.
