પાકિસ્તાનના ભૂતપૂર્વ કેપ્ટન બાબર આઝમે શનિવારે દક્ષિણ આફ્રિકા સામેની છેલ્લી ODI દરમિયાન આંતરરાષ્ટ્રીય ક્રિકેટમાં 15,000 રન પૂરા કર્યા. આ સિદ્ધિ મેળવનાર તે પાકિસ્તાનનો પાંચમો બેટ્સમેન બની ગયો છે, પરંતુ સૌથી મહત્વની વાત એ છે કે તેણે પાકિસ્તાનના અન્ય બેટ્સમેનોની તુલનામાં ઓછી ઇનિંગ્સમાં આ સિદ્ધિ મેળવી છે. બાબર ઉપરાંત ઈન્ઝમામ-ઉલ-હક, યુનિસ ખાન, મોહમ્મદ યુસુફ અને જાવેદ મિયાંદાદે પાકિસ્તાન માટે આ સિદ્ધિ મેળવી છે. બાબર આઝમ ત્રણેય ફોર્મેટ (ટેસ્ટ, ODI, T20)માં સાતત્ય અને ઉત્તમ પ્રદર્શન માટે જાણીતો છે.
બાબર આઝમે આ સિદ્ધિ માત્ર 370 ઇનિંગ્સમાં હાંસલ કરી છે, જ્યારે પાકિસ્તાનના અન્ય ચાર મહાન બેટ્સમેનોને આ આંકડા સુધી પહોંચવા માટે 400 થી 550ની વચ્ચેની ઇનિંગ્સ રમવી પડી હતી. બાબર આઝમે દક્ષિણ આફ્રિકા સામેની ત્રીજી વનડેમાં 32 બોલમાં 27 રનની ઇનિંગ રમી હતી. જોકે ત્રણ રન લેવાના પ્રયાસમાં તે રનઆઉટ થયો હતો. 329 મેચોમાં બાબરે 45.46ની એવરેજથી 15004 રન બનાવ્યા છે, જેમાં 31 સદી અને 104 અડધી સદી સામેલ છે, તેનો સર્વશ્રેષ્ઠ સ્કોર 196 છે.
દક્ષિણ આફ્રિકાને 37.5 ઓવરમાં 143 રનમાં ઓલઆઉટ કર્યા બાદ પાકિસ્તાને 25.1 ઓવરમાં ત્રણ વિકેટે 144 રન બનાવીને મેચ જીતી લીધી હતી. બેટિંગ કરવા આવેલા પાકિસ્તાનની શરૂઆત સારી રહી ન હતી અને પહેલી જ ઓવરમાં ફખર ઝમાન (0)ની વિકેટ ગુમાવી દીધી હતી. આ પછી બેટિંગ કરવા આવેલા બાબર આઝમે સેમ અયુબ સાથે બીજી વિકેટ માટે 64 રન જોડ્યા હતા. આ દરમિયાન 11મી ઓવરમાં બાબર આઝમ (27) રનઆઉટ થઈને પેવેલિયન પરત ફર્યો હતો. મોહમ્મદ રિઝવાને સેમ અયુબ સાથે 65 રનની ભાગીદારી કરી અને પોતાની ટીમને ટાર્ગેટ સુધી પહોંચાડી.
બજોર્ન ફોર્ટને 24મી ઓવરના ચોથા બોલ પર સેમ અયુબને ફસાવી દીધો હતો. સેમ અયુબે 70 બોલમાં 11 ચોગ્ગા અને એક છગ્ગા સાથે 77 રનની શાનદાર ઇનિંગ રમી હતી. દક્ષિણ આફ્રિકા તરફથી નાન્દ્રે બર્જર અને બજોર્ન ફોર્ટને એક-એક બેટ્સમેનને આઉટ કર્યા હતા. અબરાર અહેમદને ‘પ્લેયર ઓફ ધ મેચ’ અને ક્વિન્ટન ડી કોકને ‘પ્લેયર ઓફ ધ સિરીઝ’ આપવામાં આવ્યો હતો.
આ પહેલા શનિવારે દક્ષિણ આફ્રિકાએ ટોસ જીતીને પ્રથમ બેટિંગ કરવાનો નિર્ણય કર્યો હતો. ક્વિન્ટન ડી કોક અને લુઆન-ડ્રે પ્રિટોરિયસે પ્રથમ વિકેટ માટે 72 રન જોડ્યા હતા. 15મી ઓવરમાં આઘા સલમાને લુઆન-ડ્રે પ્રિટોરિયસ (39)ને આઉટ કરીને પાકિસ્તાનને પ્રથમ સફળતા અપાવી હતી. વિકેટના મામલે ટોની ડીજ્યોર્જ (બે) પણ સલમાનનો શિકાર બન્યો હતો. 26મી ઓવરમાં મોહમ્મદ નવાઝે ક્વિન્ટન ડી કોક (53)ને આઉટ કરીને દક્ષિણ આફ્રિકાને ત્રીજો ઝટકો આપ્યો હતો.
