ભારત અને દક્ષિણ આફ્રિકા વચ્ચે બે મેચની ટેસ્ટ શ્રેણીની પ્રથમ મેચ કોલકાતાના ઈડન ગાર્ડન્સ ખાતે રમાઈ રહી છે. શુક્રવારે મેચના પહેલા દિવસે સાઉથ આફ્રિકાની ટીમ 159 રન પર જ સિમિત રહી હતી. જવાબમાં ભારતની શરૂઆત સારી રહી ન હતી. ઓપનર યશસ્વી જયસ્વાલે સસ્તામાં પોતાની વિકેટ ગુમાવી દીધી હતી. તેણે 27 બોલમાં ત્રણ ચોગ્ગાની મદદથી 12 રન બનાવ્યા હતા. તે સાતમી ઓવરમાં માર્કો જેન્સન દ્વારા બોલ્ડ થયો હતો. 22 વર્ષીય યશસ્વીની ટેસ્ટ કરિયરની આ 50મી ઇનિંગ હતી. જો કે કોલકાતા ટેસ્ટની પ્રથમ ઇનિંગમાં ફ્લોપ રહેવા છતાં યશસ્વીએ મહાન બેટ્સમેન સચિન તેંડુલકરનો રેકોર્ડ તોડી નાખ્યો હતો.
વાસ્તવમાં, યશસ્વીએ ટેસ્ટ ક્રિકેટમાં 50 ઇનિંગ્સ પછી સૌથી વધુ રન બનાવનારા ભારતીય ખેલાડીઓની યાદીમાં સચિનને પાછળ છોડી દીધો છે. તે 2420 રન સાથે ચોથા સ્થાને છે. સચિને તેની ટેસ્ટ કારકિર્દીની પ્રથમ 50 ઇનિંગ્સમાં 2415 રન બનાવ્યા હતા. ભારત માટે 50 ઈનિંગ્સ બાદ સૌથી વધુ ટેસ્ટ રન બનાવવાનો રેકોર્ડ ગૌતમ ગંભીરના નામે છે. ભારતના ભૂતપૂર્વ ઓપનિંગ બેટ્સમેન અને હાલના મુખ્ય કોચ ગંભીરે 2692 રન ઉમેર્યા હતા. તેના પછી પૂર્વ દિગ્ગજ રાહુલ દ્રવિડનો નંબર આવે છે, જેણે 2540 રન બનાવ્યા છે. ભૂતપૂર્વ વિસ્ફોટક ઓપનર વીરેન્દ્ર સેહવાગ આ યાદીમાં ત્રીજા સ્થાને છે. તેણે 50 ઇનિંગ્સમાં 2535 રન બનાવ્યા હતા.
કોલકાતા ટેસ્ટની વાત કરીએ તો, ભારતે પહેલા દિવસે સ્ટમ્પ પર એક વિકેટે 37 રન બનાવીને પોતાની સ્થિતિ મજબૂત કરી હતી. ભારત હજુ પણ પ્રથમ દાવમાં 122 રન પાછળ છે જ્યારે વોશિંગ્ટન સુંદર (6) લોકેશ રાહુલ (13) સાથે અણનમ છે. દક્ષિણ આફ્રિકાના ફાસ્ટ બોલરોએ પણ શાનદાર લાઇન લેન્થ સાથે બોલિંગ કરી અને ભારતીય બેટ્સમેનોને હાથ ખોલવાની તક આપી ન હતી. કેશવ મહારાજે પોતાની સ્પિન બોલિંગથી રાહુલને થોડો પરેશાન કર્યો અને કેટલાક પ્રસંગોએ બોલ તેના બેટ અને વિકેટની ખૂબ નજીક આવી ગયો. ત્રીજા નંબરે બેટિંગ કરવા આવેલા સુંદરની પણ આવી જ સ્થિતિ હતી પરંતુ બંને બેટ્સમેન પોતાની વિકેટ બચાવવામાં સફળ રહ્યા હતા.
