હોંગકોંગમાં તાજેતરમાં એક બિલ્ડીંગમાં લાગેલી ભયાનક આગમાં 100 થી વધુ લોકોના મોત બાદ વધુ એક બહુમાળી ઈમારતમાં ભીષણ આગ લાગવાના સમાચાર સામે આવ્યા છે. મંગળવારે ઈન્ડોનેશિયાના જકાર્તામાં એક ઓફિસ બિલ્ડિંગમાં આગ ફાટી નીકળી હતી, જેમાં ઓછામાં ઓછા 20 લોકોના મોત થયા હતા. એસોસિએટેડ પ્રેસના અહેવાલ મુજબ, પોલીસ અધિકારીઓએ જણાવ્યું હતું કે જ્વાળાઓએ થોડીવારમાં આખી ઇમારતને લપેટમાં લીધી હતી, જેના કારણે લોકોમાં ગભરાટ ફેલાયો હતો.
આગ લાગતાની સાથે જ સેન્ટ્રલ જકાર્તાના એક વિસ્તારમાં નજીકમાં રહેતા લોકો અને કર્મચારીઓમાં અરાજકતા ફેલાઈ ગઈ હતી. સેન્ટ્રલ જકાર્તાના પોલીસ વડા સુસાત્યો પૂર્ણોમો કોન્ડ્રોના હવાલાથી કહેવામાં આવ્યું હતું કે આગમાં માર્યા ગયેલા લોકોમાં પાંચ પુરૂષો અને 15 મહિલાઓનો સમાવેશ થાય છે. તેમણે કહ્યું કે મૃત્યુ પામેલાઓમાં એક ગર્ભવતી મહિલા પણ સામેલ છે. સ્થાનિક કોમ્પાસ ટીવી અનુસાર, હાલમાં આગ પર કાબૂ મેળવી લેવામાં આવ્યો છે, પરંતુ ઘણા લોકો ફસાયા હોવાની આશંકા છે. બચાવ કામગીરી ચાલી રહી છે.
આગ કેવી રીતે લાગી?
સ્થાનિક મીડિયા અનુસાર, બેટરીમાં લાગેલી આગએ ગંભીર સ્વરૂપ ધારણ કર્યું હતું. અહેવાલો કહે છે કે જે બિલ્ડીંગમાં આગ લાગી તે ટેરા ડ્રોન ઇન્ડોનેશિયાની ઓફિસ છે, જે ખાણકામથી લઈને કૃષિ સુધીના ક્ષેત્રોમાં ગ્રાહકો માટે ડ્રોન બનાવે છે. કોમ્પાસ ટીવી સાથે વાત કરતા, સેન્ટ્રલ જકાર્તા મેટ્રો પોલીસ ચીફ સિનિયર કમિશનર સુસાત્યો પૂર્ણોમો કોન્ડ્રોએ જણાવ્યું હતું કે આગ પહેલા માળે લાગી હતી.
“પહેલા માળે એક બેટરી હતી જેમાં આગ લાગી હતી, પછી સ્ટાફે તેને બુઝાવી દીધી હતી, પરંતુ બાદમાં જાણવા મળ્યું હતું કે સળગતી બેટરીથી આગ ઉપરના માળ સુધી ફેલાઈ હતી,” તેમણે કહ્યું. સુસાત્યોએ જણાવ્યું કે આગ વિકરાળ બની હતી અને ધુમાડો બિલ્ડિંગના છઠ્ઠા માળ સુધી પહોંચી ગયો હતો. તેમણે કહ્યું કે તમામ મૃતકોને ઓળખ માટે હોસ્પિટલમાં લઈ જવામાં આવ્યા છે.
