સિડનીના બોન્ડી બીચ પર ગોળીબાર કરનારા હુમલાખોરોની ઓળખનો દાવો કરવામાં આવ્યો છે. ઓસ્ટ્રેલિયન મીડિયા અનુસાર, એક હુમલાખોરનું નામ નવીદ અકરમ છે. તે પાકિસ્તાનનો વતની છે. અધિકારીઓને ટાંકીને કહેવામાં આવ્યું છે કે હાલમાં તે સિડનીના દક્ષિણ-પશ્ચિમમાં રહેતો હતો. અધિકારીઓએ નામ ન આપવાની શરતે જણાવ્યું કે નવીદ અકરમનું ઘર બોનીરિગના ઉપનગરમાં છે. અહીં પોલીસ અધિકારીઓએ દરોડો પાડ્યો હતો. તમને જણાવી દઈએ કે સિડનીના બોન્ડી બીચ પર યહૂદી લોકોના સેલિબ્રેશન દરમિયાન ગોળીઓ ચલાવવામાં આવી હતી. બે હુમલાખોરોએ વધુ 50 રાઉન્ડ ફાયરિંગ કર્યું અને 12 લોકો માર્યા ગયા.
પોલીસે એક હુમલાખોરને ઠાર માર્યો હતો જ્યારે અન્યની ધરપકડ કરવામાં આવી હતી. ‘ઓસ્ટ્રેલિયન બ્રોડકાસ્ટિંગ કોર્પોરેશન’ (ABC) એ પોતાના સમાચારમાં આ જાણકારી આપી. પોલીસ પ્રવક્તાને ટાંકીને એબીસીએ જણાવ્યું કે હુમલામાં 12 લોકો ઘાયલ પણ થયા છે. તેમાં કહેવામાં આવ્યું છે કે એક હુમલાખોર માર્યો ગયો હતો જ્યારે બીજાની ધરપકડ કરવામાં આવી હતી. હજુ સુધી એ સ્પષ્ટ થયું નથી કે માર્યા ગયેલા હુમલાખોર નાવેદ અકરમ હતા કે અન્ય કોઈ.
સિડનીના ન્યૂ સાઉથ વેલ્સ પોલીસ કમિશનર એમ. લેન્યોને જણાવ્યું કે આ હુમલામાં બે પોલીસ અધિકારીઓ સહિત 29 લોકો ઘાયલ થયા છે. તેમણે કહ્યું કે ઘાયલોને એમ્બ્યુલન્સ દ્વારા હોસ્પિટલમાં લઈ જવામાં આવ્યા છે. રાજ્યના પ્રીમિયર ક્રિસ મિન્સે કહ્યું, ‘આ હુમલાનું નિશાન સિડનીનો યહૂદી સમુદાય હતો.’ હનુક્કાહના યહૂદી તહેવારની શરૂઆતની ઉજવણી કરવા માટે સેંકડો લોકો બોન્ડી બીચ પર ‘ચનુકાહ બાય ધ સી’ તરીકે ઓળખાતી ઇવેન્ટ માટે એકઠા થયા હતા.
પોલીસે જણાવ્યું હતું કે તેમનું ઓપરેશન ચાલુ છે અને આસપાસના વિસ્તારમાં મળી આવેલી અનેક શંકાસ્પદ વસ્તુઓની નિષ્ણાત અધિકારીઓ દ્વારા તપાસ કરવામાં આવી રહી છે, જેમાં એક શંકાસ્પદની કારમાંથી મળી આવેલ IEDનો પણ સમાવેશ થાય છે.
વડા પ્રધાન એન્થોની અલ્બેનિસે કહ્યું કે તેમના વિચારો અસરગ્રસ્ત તમામ લોકો સાથે છે. “બોન્ડી બીચ પરના દ્રશ્યો આઘાતજનક અને દુ:ખદ છે,” તેમણે કહ્યું. પોલીસ અને ઈમરજન્સી કર્મચારીઓ ઘટનાસ્થળે હાજર છે અને જીવ બચાવવાનો પ્રયાસ કરી રહ્યા છે.
