બાંગ્લાદેશની રાજધાની ઢાકામાં, અગ્રણી યુવા નેતા અને ‘ઇન્કલાબ મંચ’ના પ્રવક્તા શરીફ ઉસ્માન હાદીને શનિવારે રાષ્ટ્રીય કવિ કાઝી નઝરુલ ઇસ્લામની કબરની બાજુમાં દફનાવવામાં આવ્યા હતા. હાદીના પક્ષે મોહમ્મદ યુનુસની આગેવાની હેઠળની વચગાળાની સરકારને 24 કલાકનું અલ્ટીમેટમ જારી કર્યું હતું, જેમાં તેની (હાદીની) હત્યા માટે જવાબદાર લોકોની ધરપકડ કરવા તરફ “સ્પષ્ટ પ્રગતિ”ની માંગણી કરવામાં આવી હતી. અગાઉ, ઢાકામાં કડક સુરક્ષા વચ્ચે હાદીના અંતિમ સંસ્કારની નમાજ અદા કરવામાં આવી હતી, જેના માટે મોટી સંખ્યામાં લોકો એકઠા થયા હતા.
વચગાળાની સરકારના મુખ્ય સલાહકાર મોહમ્મદ યુનુસ તેમની સલાહકાર પરિષદના સભ્યો અને આર્મી ચીફ જનરલ વોકર-ઉઝ-ઝમાને માણિક મિયા એવેન્યુ પર સંસદ ભવન સંકુલના ‘સાઉથ પ્લાઝા’ ખાતે ‘ઇન્કલાબ મંચ’ના પ્રવક્તા હાદી (32)ની અંતિમયાત્રામાં હાજરી આપી હતી. યુનુસે અંતિમ સંસ્કાર પહેલા સંક્ષિપ્ત નિવેદન આપ્યું હતું. ભૂતપૂર્વ વડા પ્રધાન ખાલિદા ઝિયાની બાંગ્લાદેશ નેશનાલિસ્ટ પાર્ટી (BNP), જમાત-એ-ઈસ્લામી અને વિદ્યાર્થીઓની આગેવાની હેઠળની નેશનલ સિટીઝન પાર્ટી (NCP) ના નેતાઓએ પણ અંતિમ સંસ્કારમાં ભાગ લીધો હતો.
હાદી ગયા વર્ષે વિદ્યાર્થીઓની આગેવાની હેઠળના વિરોધ પ્રદર્શનમાં સામેલ મુખ્ય નેતાઓમાંનો એક હતો. આ વિરોધોના કારણે તત્કાલિન વડાપ્રધાન શેખ હસીનાની સરકાર પડી. તેઓ 12 ફેબ્રુઆરીએ યોજાનારી સામાન્ય ચૂંટણીમાં ઉમેદવાર હતા. 12 ડિસેમ્બરે મધ્ય ઢાકાના વિજયનગર વિસ્તારમાં માસ્ક પહેરેલા બંદૂકધારીઓએ હાદીને માથામાં ગોળી મારી દીધી હતી જ્યારે તે પોતાનો ચૂંટણી પ્રચાર શરૂ કરી રહ્યો હતો. બાદમાં સિંગાપોરમાં સારવાર દરમિયાન તેનું મોત થયું હતું.
હાદીના મોત બાદ દેશમાં અશાંતિ ફેલાઈ ગઈ છે. તેમના મૃત્યુ બાદ બાંગ્લાદેશમાં એક દિવસનો રાજ્ય શોક જાહેર કરવામાં આવ્યો હતો. હાદીની પાર્ટીના સભ્ય સચિવ અબ્દુલ્લા અલ જબીરે શાહબાગમાં આયોજિત વિરોધ રેલીના મંચ પરથી કહ્યું, “જો સરકાર શરીફ ઉસ્માન હાદીના હત્યારાઓની ધરપકડ અંગે આવતીકાલે સાંજે 5:15 વાગ્યા સુધીમાં જવાબ નહીં આપે તો અમે અમારું વિરોધ પ્રદર્શન ફરી શરૂ કરીશું.”
લગભગ ત્રણ કલાકના વિરોધ બાદ પ્રદર્શનકારીઓએ શાહબાગ ખાલી કરી દીધું, ત્યારબાદ આસપાસના વિસ્તારોમાં ટ્રાફિક ધીમે ધીમે સામાન્ય થઈ ગયો. ટેલિવિઝન ચેનલ પર પ્રસારિત વિઝ્યુઅલ્સમાં જોઈ શકાય છે કે હાદીના મૃતદેહને પોસ્ટમોર્ટમ બાદ સરકારી સુહરાવર્દી હોસ્પિટલમાંથી લાવવામાં આવ્યા બાદ અંતિમ સંસ્કારની નમાજ અદા કરવામાં આવી હતી.
