ઓસ્ટ્રેલિયાએ ઈંગ્લેન્ડ સામે 26 ડિસેમ્બરથી શરૂ થનારી બોક્સિંગ ડે ટેસ્ટ માટે ટીમની જાહેરાત કરી છે. સ્ટીવ સ્મિથ આ ટેસ્ટમાં વાપસી કરી રહ્યો છે, જ્યારે નિયમિત કેપ્ટન પેટ કમિન્સ આ મેચ માટે ઉપલબ્ધ નથી. સ્ટીવ સ્મિથ ફરી એકવાર ઓસ્ટ્રેલિયન ટીમની કેપ્ટનશીપ કરતો જોવા મળશે. ઓસ્ટ્રેલિયાએ 5 મેચની આ શ્રેણીમાં પહેલાથી જ 3-0ની અજેય સરસાઈ મેળવી લીધી છે. ઓસ્ટ્રેલિયાએ સ્મિથની કપ્તાનીમાં પ્રથમ બે મેચ જીતી હતી, જ્યારે ત્રીજી ટેસ્ટ પેટ કમિન્સના નેતૃત્વમાં જીતી હતી. આ સિવાય ટીમમાં આકર્ષણનું કેન્દ્ર ઝાય રિચર્ડસન છે જે 4 વર્ષ બાદ ઓસ્ટ્રેલિયન ટીમમાં પુનરાગમન કરી રહ્યો છે.
ઓસ્ટ્રેલિયાએ પોતાની 12 ખેલાડીઓની ટીમમાં એક પણ સ્પિનરને સામેલ કર્યો નથી. નાથન લિયોનના સ્થાને ટીમમાં આવેલા ટોડ મર્ફીને પણ આ વખતે ટીમમાં પસંદ કરવામાં આવ્યો નથી.
ફાસ્ટ બોલર ઝાય રિચર્ડસન, જે 2021 થી લાંબા ફોર્મેટમાં રમ્યો નથી, તે ખભાની સર્જરી પછી પુનરાગમન કરી રહ્યો છે. તેણે ઘરેલુ ક્રિકેટમાં શાનદાર પ્રદર્શન કર્યું છે.
પ્રથમ બે ટેસ્ટ રમનાર બ્રેન્ડન ડોગેટ અને ગુલાબી બોલની મેચનો ભાગ બનેલા માઈકલ નેસરને પણ ટીમમાં સામેલ કરવામાં આવ્યા છે, ઓસ્ટ્રેલિયા સંપૂર્ણ રીતે પેસ એટેક પર ધ્યાન કેન્દ્રિત કરી રહ્યું છે.
