ઓડિશાના ભદ્રક જિલ્લામાં 10 વર્ષની બાળકી પર કથિત બળાત્કાર અને હત્યાનો મામલો પ્રકાશમાં આવ્યા બાદ સ્થાનિક લોકોએ વિરોધ કર્યો હતો. પોલીસે બુધવારે આ જાણકારી આપી. ભદ્રકના પોલીસ અધિક્ષક (SP) મનોજ કુમાર રાઉતે જણાવ્યું કે આ કેસમાં જગતસિંહપુર જિલ્લામાંથી એક આરોપીની ધરપકડ કરવામાં આવી છે.
મુખ્ય પ્રધાન મોહન ચરણ માઝીએ પીડિત પરિવારને 10 લાખ રૂપિયાની આર્થિક સહાયની જાહેરાત કરી અને અધિકારીઓને કાયદા મુજબ કેસની યોગ્ય તપાસ સુનિશ્ચિત કરવા અને આરોપીઓને “સખતમાં સખત સજા” આપવા નિર્દેશ આપ્યો. આ ઘટનાના વિરોધમાં વિરોધ પક્ષો બીજુ જનતા દળ (બીજેડી) અને કોંગ્રેસે બુધવારે સવારે 6 વાગ્યાથી છ કલાક માટે અલગ ચાંદબલી બ્લોક બંધનું આહ્વાન કર્યું હતું.
અન્ય એક અધિકારીએ જણાવ્યું કે આ ઘટના ત્યારે પ્રકાશમાં આવી જ્યારે કેટલાક લોકોએ મંગળવારે સાંજે ચાંદબલી પોલીસ સ્ટેશન વિસ્તારના બાલીગાંવમાં ઝાડીઓ પાસે એક સગીરનો લોહીથી લથપથ મૃતદેહ મળ્યો. પીડિતા મંગળવારે સવારે શાળાએ ગઈ હતી, પરંતુ બપોરે ઘરે પરત ફરી ન હતી. આ પછી તેના પરિવારજનોએ પોલીસમાં ફરિયાદ નોંધાવી હતી. ગુમ થયાનો કેસ નોંધાયાના થોડા કલાકો બાદ સ્થાનિક લોકોને તેનો મૃતદેહ મળી આવ્યો હતો.
ચાંદબલીથી બીજેડીના ધારાસભ્ય વ્યોમકેશ રાયે આ ઘટનાની નિંદા કરી છે. ગુસ્સે ભરાયેલા સ્થાનિક રહેવાસીઓએ ચાંદબલી વિસ્તારમાં વિરોધ કર્યો જ્યારે બીજેડીના કાર્યકરોએ ભુવનેશ્વરમાં મુખ્યમંત્રીના સત્તાવાર નિવાસસ્થાનની બહાર સૂત્રોચ્ચાર કર્યા. વિપક્ષી પાર્ટીએ ભાજપ સરકાર પર રાજ્યમાં મહિલાઓ અને યુવતીઓ સામે થતા જાતીય સતામણીની ઘટનાઓને રોકવામાં નિષ્ફળ જવાનો આરોપ લગાવ્યો હતો.
ઘટનાની જાણ થતાં જ મંગળવારે રાત્રે સ્થાનિક રહીશો રસ્તા પર ઉતરી આવ્યા હતા. બુધવારે સવારે વિરોધ વધુ તીવ્ર બન્યો, જ્યારે વિરોધીઓએ ચાંદબલીમાં ઓછામાં ઓછા ત્રણ સ્થળોએ રસ્તાઓ બંધ કરી દીધા. તેઓએ સ્થાનિક પોલીસ સ્ટેશનનો ઘેરાવ પણ કર્યો હતો. આરોપીની ઓળખ થયા બાદ રોષે ભરાયેલા સ્થાનિક લોકો રામપાલી ગામમાં તેના ઘરે પહોંચ્યા અને તેને તોડી નાખ્યો.
