15 વર્ષ બાદ વિજય હજારે ટ્રોફીમાં વાપસી કરી રહેલા વિરાટ કોહલીની શરૂઆત ધમાકેદાર રહી હતી. આંધ્ર સામેની પહેલી જ મેચમાં તેણે સદી ફટકારીને દિલ્હીની જીતમાં મહત્વની ભૂમિકા ભજવી હતી. 299 રનનો પીછો કરતા ચેઝ માસ્ટર વિરાટ કોહલીએ 131 રનની શાનદાર ઇનિંગ રમી હતી. લિસ્ટ-એ ક્રિકેટમાં કોહલીની આ 58મી સદી હતી, જેમાં આંતરરાષ્ટ્રીય ક્રિકેટમાં 50 ઓવરના ફોર્મેટમાં તેની 53 સદીનો સમાવેશ થાય છે. હવે વિરાટ કોહલીની નજર લિસ્ટ-એમાં સૌથી વધુ સદી ફટકારવાના સચિન તેંડુલકરના ‘મહારી રેકોર્ડ’ પર છે. તમને જણાવી દઈએ કે, વિરાટ કોહલી અને સચિન તેંડુલકર વચ્ચે બહુ અંતર નથી.
સચિન તેંડુલકરે આંતરરાષ્ટ્રીય ક્રિકેટમાં ODIમાં 49 સદી ફટકારી હતી, તેના નામે લિસ્ટ Aમાં કુલ 60 સદી ફટકારવાનો વર્લ્ડ રેકોર્ડ છે. તેણે 538 ઇનિંગ્સ રમીને આ રેકોર્ડ બનાવ્યો હતો.
જ્યારે વિરાટ કોહલી હવે 330 ઇનિંગ્સમાં 58 સદી સાથે બીજા સ્થાને છે. કિંગ કોહલી સચિન તેંડુલકરની બરાબરીથી માત્ર બે સદી દૂર છે અને તેનો વર્લ્ડ રેકોર્ડ તોડવાથી ત્રણ સદી દૂર છે.
