વિજય હજારે ટ્રોફી 2025-26નો પ્રથમ દિવસ રેકોર્ડબ્રેક રહ્યો હતો. આ રેકોર્ડની યાદીમાં કર્ણાટકનું એક નામ પણ જોડાયું છે. મયંક અગ્રવાલની આગેવાની હેઠળની કર્ણાટક ક્રિકેટ ટીમે જ્યારે ઝારખંડ સામે વિજય હજારે ટ્રોફીના ઈતિહાસમાં સૌથી મોટો રન ચેઝ કર્યો ત્યારે ઈતિહાસ રચ્યો હતો. આ મેચમાં પ્રથમ બેટિંગ કરતા ઝારખંડે કર્ણાટક સામે 413 રનનો ટાર્ગેટ આપ્યો હતો, ઈશાન કિશને 33 બોલમાં તોફાની સદી ફટકારી હતી અને 39 બોલમાં 125 રન બનાવ્યા હતા. કર્ણાટક આ સ્કોર હાંસલ કરવામાં સફળ રહેશે એવી કોઈને અપેક્ષા નહોતી. પરંતુ કર્ણાટકની ટીમે ન માત્ર આ સ્કોરનો સફળતાપૂર્વક પીછો કર્યો પરંતુ એક રેકોર્ડ પણ બનાવ્યો.
વિજય હઝારે ટ્રોફીના ઈતિહાસમાં અગાઉ, આંધ્ર પાસે સૌથી સફળ રન ચેઝનો રેકોર્ડ હતો, તેઓએ 2012માં ગોવા સામે 385 રનનો લક્ષ્યાંક હાંસલ કર્યો હતો. કર્ણાટક પહેલા, આ ટુર્નામેન્ટમાં કોઈ પણ ટીમે 400થી વધુના સ્કોરનો સફળતાપૂર્વક પીછો કર્યો ન હતો.
કર્ણાટકે ઝારખંડના 413 રનના લક્ષ્યાંકનો પીછો કરીને માત્ર 47.3 ઓવરમાં જ ઈતિહાસ રચી દીધો હતો. આ દરમિયાન કર્ણાટક તરફથી ઓપનર દેવદત્ત પડિકલે 147 રનની શાનદાર ઇનિંગ રમી હતી. મયંક અગ્રવાલ અને અભિનવ મનોહરે પણ તોફાની અડધી સદી ફટકારી હતી.
વિજય હજારે ટ્રોફીમાં અત્યાર સુધીનો સૌથી મોટો રન ચેઝ
413/5 કર્ણાટક વિ ઝારખંડ, 2025
