વૈભવ સૂર્યવંશી : ભારતીય ક્રિકેટનું એવું નામ બની ગયું છે, જે ખૂબ જ નાની ઉંમરમાં દેશભરમાં ચર્ચાનો વિષય છે. મેદાન પર તેના ઐતિહાસિક પ્રદર્શન બાદ યુવા ક્રિકેટ સેન્સેશનને હવે રાષ્ટ્રીય સ્તરે ખૂબ સન્માન મળ્યું છે. વૈભવ સૂર્યવંશીને રાષ્ટ્રીય બાળ પુરસ્કારથી સન્માનિત કરવામાં આવ્યા છે, જે તેમની પ્રતિભા, મહેનત અને શિસ્તનું પ્રમાણ છે.
રાષ્ટ્રપતિ દ્રૌપદી મુર્મુએ દિલ્હીમાં આયોજિત સન્માન સમારોહમાં વૈભવને આ પ્રતિષ્ઠિત પુરસ્કાર અર્પણ કર્યો હતો. આ પ્રસંગે એવી માહિતી પણ સામે આવી છે કે વૈભવ સૂર્યવંશી ટૂંક સમયમાં વડાપ્રધાન નરેન્દ્ર મોદીને મળશે. આ સન્માન માત્ર વૈભવની વ્યક્તિગત સિદ્ધિ નથી, પરંતુ દેશના કરોડો બાળકો અને યુવાનો માટે પ્રેરણાનો સ્ત્રોત છે કે સાચી દિશા અને મહેનતથી નાની ઉંમરમાં પણ મોટા સપના સાકાર કરી શકાય છે.
વૈભવ સૂર્યવંશી તાજેતરના મહિનાઓમાં ક્રિકેટની દુનિયામાં ઘણી ઐતિહાસિક સિદ્ધિઓ હાંસલ કરી છે. IPL 2025 ની હરાજીમાં રાજસ્થાન રોયલ્સે તેને કરોડો રૂપિયામાં ખરીદ્યો, જેનાથી તે IPL ઇતિહાસનો સૌથી યુવા ખેલાડી બન્યો. આ પછી તેણે પોતાના શાનદાર પ્રદર્શનથી બધાને ચોંકાવી દીધા અને IPLમાં સદી ફટકારનાર સૌથી યુવા ખેલાડી બનવાનો રેકોર્ડ પણ પોતાના નામે કર્યો.
બિહાર તરફથી રમતા વૈભવ સૂર્યવંશીએ વિજય હજારે ટ્રોફી અને અન્ય સ્થાનિક ટૂર્નામેન્ટમાં પોતાની આક્રમક બેટિંગથી દિગ્ગજોને પ્રભાવિત કર્યા છે. ખૂબ જ નાની ઉંમરે સતત રેકોર્ડ બનાવવાથી તે ભારતીય ક્રિકેટ પ્રોડિજી તરીકે સ્થાપિત થાય છે.
