ફેન્સ ક્રિકેટના મેદાનમાં મનોરંજન માટે જાય છે, પરંતુ શું તમે ક્યારેય મેચ દરમિયાન કોઈ ચાહકને કરોડપતિ બનતો જોયો છે? કદાચ નહીં, પરંતુ દક્ષિણ આફ્રિકામાં ચાલી રહેલી SA20 લીગ દરમિયાન આવું બન્યું હતું. શુક્રવારે ડરબન સુપર જાયન્ટ્સ અને MI કેપટાઉન વચ્ચે રેકોર્ડબ્રેક મેચ રમાઈ હતી. આ મેચમાં બંને ટીમોએ મળીને 449 રન બનાવ્યા હતા. આ મેચ દરમિયાન જ એક નસીબદાર ચાહક કરોડપતિ બની ગયો. આ મેચમાં રેયાન રિકલ્ટને શાનદાર સદી ફટકારી હતી, પરંતુ તેની ટીમને 15 રનથી હારનો સામનો કરવો પડ્યો હતો.
ડરબન સુપર જાયન્ટ્સે આ મેચમાં પ્રથમ બેટિંગ કરી અને રેકોર્ડ 232/5નો સ્કોર બનાવ્યો – જે SA20ના ઇતિહાસમાં સૌથી વધુ સ્કોર છે.
આ સ્કોરનો પીછો કરવા આવેલી MI કેપટાઉન ટીમ માટે રિકલ્ટને 65 બોલમાં 113 રન બનાવ્યા, પોતાની ઇનિંગમાં તેણે 11 છગ્ગા અને પાંચ ચોગ્ગા ફટકાર્યા. આમાંથી એક છગ્ગો એવો હતો જેણે ચાહકને કરોડપતિ બનાવી દીધો.
આ છગ્ગો, જે તેણે ઇનિંગની 13મી ઓવરના ચોથા બોલ પર માર્યો હતો, તેને સ્ટેન્ડમાં બેઠેલા દર્શક દ્વારા એક હાથે પકડવામાં આવ્યો હતો, જેના કારણે SA20 ની ફેન-કેચ પહેલ હેઠળ પ્રશંસકને 2 મિલિયન રેન્ડ (આશરે રૂ. 1.08 કરોડ) નું ઇનામ મળ્યું હતું.
