પાકિસ્તાનના ટેસ્ટ કેપ્ટન શાન મસૂદે 177 બોલમાં બેવડી સદી પૂરી કરીને ફર્સ્ટ ક્લાસ ક્રિકેટમાં પાકિસ્તાની બેટ્સમેન દ્વારા સૌથી ઝડપી બેવડી સદીનો નવો રેકોર્ડ બનાવ્યો છે. મસૂદે મહાન બેટ્સમેન ઈન્ઝમામ ઉલ હકનો ત્રણ દાયકા જૂનો રેકોર્ડ તોડ્યો હતો.
મસૂદે પ્રેસિડેન્ટ કપ ડિપાર્ટમેન્ટલ ટૂર્નામેન્ટના પ્રથમ દિવસે સહર એસોસિએટ્સ સામે સુઈ નોર્ધન ગેસ તરફથી રમતા આ સિદ્ધિ મેળવી હતી.
આ પહેલા આ રેકોર્ડ પૂર્વ કેપ્ટન ઈન્ઝમામના નામે હતો, જેણે 1992માં ઈંગ્લેન્ડ પ્રવાસ પર એક મેચમાં 188 બોલમાં બેવડી સદી ફટકારી હતી.
રવિવારે મેચના પહેલા દિવસે રમતના અંત સુધી મસૂદ 185 બોલમાં 212 રન બનાવીને અણનમ રહ્યો હતો.
પાકિસ્તાનની ધરતી પર સૌથી ઝડપી બેવડી સદી ફટકારવાનો રેકોર્ડ હજુ પણ ભારતના વીરેન્દ્ર સેહવાગના નામે છે, જેણે 2006માં લાહોર ટેસ્ટમાં 182 બોલમાં પોતાની બેવડી સદી પૂરી કરી હતી.
