ચીનના કાર્ગો જહાજ ઝેન હુઆ-29 એ અસાધારણ યાત્રા પૂર્ણ કરી છે. આ જહાજ 20 જૂને શાંઘાઈથી રવાના થયું હતું અને ત્રણ મહાસાગરોમાં આશરે 37,000 કિલોમીટરનું અંતર કાપીને ઓક્ટોબરમાં જમૈકાના કિંગ્સ્ટન બંદરે પહોંચ્યું હતું. આ જહાજમાં માત્ર 5 વિશાળ શિપ-ટુ-શોર ક્રેન્સ લોડ કરવામાં આવી હતી, જે ચીનમાં બનાવવામાં આવી હતી. આને અમેરિકાના ગલ્ફ કોસ્ટ અને જમૈકાના બંદરો પર મોકલવામાં આવ્યા હતા. સામાન્ય રીતે પેસિફિક મહાસાગર અને પનામા કેનાલ દ્વારા આ મુસાફરી એક મહિનામાં પૂર્ણ થઈ શકતી હતી, પરંતુ વહાણની બાજુઓમાંથી બહાર નીકળેલી ક્રેનના લાંબા હાથને કારણે પનામા કેનાલમાંથી પસાર થવું અશક્ય હતું. જેના કારણે કેનાલને નુકસાન થઈ શકે છે. તેથી જહાજને વિશ્વભરમાં લાંબો માર્ગ લેવો પડ્યો.
પ્રવાસનો સૌથી પડકારજનક અને ખતરનાક ભાગ આફ્રિકાના દક્ષિણ છેડા કેપ ઓફ ગુડ હોપની આસપાસનો હતો. જહાજના કપ્તાન ટાય મેકમાઇકલના જણાવ્યા અનુસાર, મોઝામ્બિકના દરિયાકાંઠે લગભગ બે અઠવાડિયા અને દક્ષિણ આફ્રિકાના દરિયાકાંઠે 12 ફૂટ ઊંચા મોજાંને કારણે લગભગ એક અઠવાડિયા સુધી રાહ જોવી પડી હતી. અંતે, આફ્રિકાની પરિક્રમા 14 ઓગસ્ટના રોજ પૂર્ણ થઈ અને 3 અઠવાડિયામાં તે વેનેઝુએલામાંથી પસાર થઈને એટલાન્ટિક મહાસાગરને પાર કરી અને 11 સપ્ટેમ્બરે મિસિસિપીના ગલ્ફપોર્ટ પહોંચ્યું.
ચીનમાં બનેલી ક્રેન્સ પર નિર્ભરતા
ટેક્સાસ અને જમૈકામાં ક્રેન્સ અનલોડ કર્યા પછી, જહાજે પનામા કેનાલ દ્વારા શોર્ટકટ લીધો. 3 ડિસેમ્બરે જહાજ શાંઘાઈ પરત ફર્યું. આ રીતે કુલ 6 મહિનાનું પરિભ્રમણ પૂર્ણ થયું. આ સફર વૈશ્વિક વેપારમાં ચીની બનાવટની ક્રેન્સ પરની નિર્ભરતાને દર્શાવે છે. યુએસ બંદરોમાં લગભગ 80 ટકા શિપ-ટુ-શોર ક્રેન્સ ચીનની છે, જેને રિપબ્લિકન અને ડેમોક્રેટિક બંને સરકારો રાષ્ટ્રીય સુરક્ષા માટે જોખમ માને છે. વ્હાઇટ હાઉસ હવે અન્ય દેશોમાંથી ક્રેન્સ મંગાવવા અને સ્થાનિક ઉત્પાદન પુનઃસ્થાપિત કરવાનો પ્રયાસ કરી રહ્યું છે. જો કે, છેલ્લા 20 વર્ષથી ચાઈનીઝ ક્રેન્સ સૌથી સસ્તો અને સરળ વિકલ્પ રહ્યો છે.
