ઓસ્ટ્રેલિયાએ ઈંગ્લેન્ડ સામે ચાલી રહેલી એશિઝ 2025-26 શ્રેણીની પાંચમી અને અંતિમ ટેસ્ટ મેચ માટે તેની 15 સભ્યોની ટીમની જાહેરાત કરી છે. આ મેચ 4 જાન્યુઆરીથી સિડનીમાં રમાશે. ઓસ્ટ્રેલિયન ટીમે શ્રેણીમાં 3-1ની અજેય સરસાઈ મેળવી લીધી છે અને એશિઝ પર પોતાની પકડ જાળવી રાખી છે. જો કે, અગાઉની મેચ ઇંગ્લેન્ડે જીતી હતી, તેથી સિડની ટેસ્ટમાં યજમાનોની નજર શાનદાર પુનરાગમન અને જીત સાથે શ્રેણીનો અંત લાવવા પર રહેશે.
ટીમ મેનેજમેન્ટે વર્કલોડ મેનેજમેન્ટના ભાગરૂપે પેટ કમિન્સને આરામ આપ્યો છે. તેની ગેરહાજરીમાં અનુભવી બેટ્સમેન સ્ટીવ સ્મિથ ટીમનું નેતૃત્વ ચાલુ રાખશે. કમિન્સને આરામ આપવાનું મુખ્ય કારણ તેની પીઠના નીચેના ભાગમાં ઈજા અને ભવિષ્યની યોજનાઓ છે. સૂત્રોના જણાવ્યા અનુસાર, “મેનેજમેંટે કમિન્સને આરામ આપવાનો નિર્ણય લીધો છે જેથી કરીને તે પોતાના વર્કલોડને નિયંત્રિત કરી શકે, કારણ કે ટીમ માટે T20 વર્લ્ડ કપ 2026 પહેલા સંપૂર્ણ રીતે ફિટ થવું મહત્વપૂર્ણ છે”. કમિન્સ આ ઈજાને કારણે શ્રેણીની પ્રથમ બે ટેસ્ટ પણ રમી શક્યો ન હતો.
ખેલાડીઓની પસંદગીની વાત કરીએ તો, અનુભવી બેટ્સમેન ઉસ્માન ખ્વાજાએ ટીમમાં પોતાનું સ્થાન જાળવી રાખ્યું છે, તેમ છતાં તેની કારકિર્દી વિશે ઘણી અટકળો ચાલી રહી હતી. ખ્વાજાએ અત્યાર સુધી ત્રણ મેચમાં 30.60ની એવરેજથી 153 રન બનાવ્યા છે, જેમાં એડિલેડમાં ફટકારેલી અડધી સદી તેનો સર્વશ્રેષ્ઠ સ્કોર છે. ઓસ્ટ્રેલિયાના પસંદગીકારોએ આ અંતિમ ટેસ્ટ માટે 15 સભ્યોની ટીમમાં અન્ય કોઈ ફેરફાર કર્યા નથી.
સિડની ટેસ્ટ માટેની સંપૂર્ણ ટીમ નીચે મુજબ છે.
સ્ટીવ સ્મિથ (કેપ્ટન), સ્કોટ બોલેન્ડ, એલેક્સ કેરી, બ્રેન્ડન ડોગેટ, કેમેરોન ગ્રીન, ટ્રેવિસ હેડ, જોશ ઈંગ્લિસ, ઉસ્માન ખ્વાજા, માર્નસ લાબુશેન, ટોડ મર્ફી, માઈકલ નેસર, જ્યે રિચાર્ડસન, મિશેલ સ્ટાર્ક, જેક વેધરલ્ડ અને બ્યુ વેબસ્ટર.
