ઝડપી બોલર મોહમ્મદ શમીને શનિવારે ન્યૂઝીલેન્ડ વિરુદ્ધ પસંદ કરાયેલી ભારતીય વનડે ટીમમાં સ્થાન મળ્યું નથી. જેનો અર્થ એ થયો કે શ્રેણીમાં સતત અવગણના કરવામાં આવતા મોહમ્મદ શમીની કારકિર્દી લગભગ ખતમ થવાના આરે છે. ઈજામાંથી પરત ફર્યા બાદ મોહમ્મદ શમી બંગાળ માટે તમામ ફોર્મેટમાં રમી રહ્યો છે અને વિકેટ પણ લઈ રહ્યો છે, પરંતુ તેની અને પસંદગીકારો વચ્ચે કોઈ તાલમેલ નથી અને તેના કારણે તેના સતત પ્રદર્શન છતાં તેને ટીમમાં સામેલ કરવામાં આવી રહ્યો નથી. શમી લાંબા સમયથી ભારતીય ટીમની બહાર છે પરંતુ ઈજામાંથી સાજા થયા બાદ તેણે બંગાળ માટે ઘરેલુ ક્રિકેટમાં શાનદાર વાપસી કરી હતી. તેણે ઘરેલુ ક્રિકેટમાં વર્તમાન સિઝનમાં અત્યાર સુધીમાં તમામ ફોર્મેટમાં 36 વિકેટ લીધી છે.
ભારતીય સ્થાનિક સિઝનની શરૂઆત રણજી ટ્રોફીથી થઈ હતી, જેમાં શમીએ ચાર મેચમાં 18.60ની સરેરાશથી 20 વિકેટ લીધી હતી. તેણે સૈયદ મુશ્તાક અલી ટ્રોફી T20 ટૂર્નામેન્ટમાં પણ તેનું શાનદાર પ્રદર્શન ચાલુ રાખ્યું અને સાત મેચમાં 14.93ની સરેરાશથી 16 વિકેટ લીધી. વિજય હજારે ટ્રોફીમાં શમી બંગાળના ઝડપી બોલિંગ આક્રમણની આગેવાની કરી રહ્યો છે. બંગાળની ટીમમાં ભારતીય ફાસ્ટ બોલર આકાશ દીપ અને મુકેશ કુમાર પણ સામેલ છે. શમીએ વિજય હજારે ટ્રોફીમાં 5 મેચમાં 11 વિકેટ ઝડપી છે. આ સાથે મોહમ્મદ શમીએ ઘરેલુ સીઝન 2025-26માં અત્યાર સુધી 16 મેચમાં કુલ 47 વિકેટ ઝડપી છે. તેના મજબૂત પ્રદર્શન છતાં, શમીની અવગણના કરવામાં આવી રહી છે, જેનો અર્થ એ છે કે મોહમ્મદ શમી હવે ટીમની યોજનાઓનો ભાગ નથી.
મોહમ્મદ શમીએ ગયા વર્ષે ન્યુઝીલેન્ડ સામે ચેમ્પિયન્સ ટ્રોફીની ફાઇનલમાં ભારત માટે છેલ્લી મેચ રમી હતી. આ મેચમાં તેણે 9 ઓવરમાં 74 રન આપીને એક વિકેટ લીધી હતી. આ પછી તેને ભારતીય ટીમમાં જગ્યા મળી ન હતી. જો કે, તે સ્થાનિક ક્રિકેટમાં સતત સક્રિય છે અને વિકેટ લઈ રહ્યો છે. ટેસ્ટમાં તેણે ભારત માટે 64 મેચમાં 229 વિકેટ લીધી છે. તેણે ODIમાં 108 મેચમાં 206 અને T20માં 25 મેચમાં 27 વિકેટ ઝડપી છે.
