ઈરાન વિરોધઃ ઈરાનમાં વિરોધની આગ વધુ ભીષણ બની રહી છે. કથળતી અર્થવ્યવસ્થા સામે દેશમાં શરૂ થયેલા વિરોધ પ્રદર્શન દરમિયાન અત્યાર સુધીમાં ઓછામાં ઓછા 35 લોકોના મોત થયા છે. સેંકડો લોકોને કસ્ટડીમાં લેવામાં આવ્યા છે પરંતુ આ વિરોધ અટકવાના કોઈ સંકેત નથી. આ દરમિયાન અમેરિકી રાષ્ટ્રપતિ ડોનાલ્ડ ટ્રમ્પે ઈરાનને હસ્તક્ષેપની ચેતવણી આપી છે અને અમેરિકા ખામેનીને પછાડવાની તક શોધી રહ્યું છે.
અમેરિકાની ‘હ્યુમન રાઈટ્સ એક્ટિવિસ્ટ ન્યૂઝ એજન્સી’એ અહેવાલ આપ્યો છે કે એક સપ્તાહથી વધુ સમયથી ચાલી રહેલા આ પ્રદર્શનો દરમિયાન 1,200થી વધુ લોકોની અટકાયત કરવામાં આવી છે. એજન્સીએ જણાવ્યું કે માર્યા ગયેલા લોકોમાં 29 દેખાવકારો, ચાર બાળકો અને ઈરાનના સુરક્ષા દળોના બે સભ્યોનો સમાવેશ થાય છે.
એજન્સી અનુસાર, ઈરાનના 31માંથી 27 પ્રાંતોમાં 250થી વધુ જગ્યાએ પ્રદર્શન થઈ રહ્યા છે. દરમિયાન, અર્ધ-સત્તાવાર સમાચાર એજન્સી ‘ફાર્સ’ એ સોમવારે મોડી રાત્રે અહેવાલ આપ્યો હતો કે વિરોધ પ્રદર્શન દરમિયાન લગભગ 250 પોલીસકર્મીઓ અને ‘બાસિજ’ દળના 45 સભ્યો ઘાયલ થયા હતા.
અમેરિકા તક શોધી રહ્યું છે
મૃત્યુની વધતી સંખ્યાને કારણે એવી પણ આશંકા છે કે અમેરિકા ટૂંક સમયમાં ઈરાનમાં હસ્તક્ષેપ કરી શકે છે. અમેરિકી રાષ્ટ્રપતિ ડોનાલ્ડ ટ્રમ્પે શુક્રવારે ઈરાનને ચેતવણી આપી હતી કે જો તેહરાન શાંતિપૂર્ણ પ્રદર્શનકારીઓ વિરુદ્ધ હિંસાનો આશરો લેશે તો અમેરિકા તેમને બચાવવા માટે આગળ આવશે.
