IAS Arun Mahesh Babu: “ક્યાં છો ભાઈ? કમિશનર સાહેબ આવી ગયા છે!” – જી હા, વડોદરામાં બુધવારે કંઈક આવું જ જોવા મળ્યું, જ્યારે મ્યુનિસિપલ કમિશનર અરુણ મહેશ બાબુ અચાનક વોર્ડ ઓફિસમાં ધસી ગયા. કમિશનરના આ ઓચિંતા નિરીક્ષણને કારણે નીચેથી ઉપર સુધીના સ્ટાફમાં ફફડાટ વ્યાપી ગયો હતો. ચા-પાણી માટે બહાર નીકળેલા કર્મચારીઓ અને અધિકારીઓના પગ નીચેથી જમીન સરકી ગઈ હતી. કમિશનર માત્ર વોર્ડ ઓફિસ ગયા જ નહીં, પણ ત્યાં જઈને વોર્ડ ઓફિસરના કામકાજના રેકોર્ડ પણ તપાસ્યા. તેમણે સ્ટાફને ચેતવણી આપતા કહ્યું કે, બેદરકારી અને ગેરહાજરી કોઈ પણ સંજોગોમાં ચલાવી લેવામાં આવશે નહીં. છેલ્લા કેટલાક વર્ષોમાં આ પહેલીવાર બન્યું છે જ્યારે વડોદરાના કમિશનરે કોર્પોરેશનની સૌથી નાની ઓફિસની આ રીતે મુલાકાત લીધી હોય. તેમના આ ‘સરપ્રાઈઝ ચેકિંગ’ની ચર્ચા હાલ આખા શહેરમાં ‘વન મેન શો’ તરીકે થઈ રહી છે.
કર્મચારીઓનો છૂટ્યો પરસેવો
હકીકતમાં, કમિશનરને વોર્ડ ઓફિસોમાં કામકાજની પદ્ધતિ અંગે સતત ફરિયાદો મળી રહી હતી. અરુણ મહેશ બાબુએ સ્પષ્ટ ચેતવણી આપી છે કે જો પગાર લેવો હોય તો દરેક વ્યક્તિએ નિષ્ઠાપૂર્વક કામ કરવું પડશે. આ મુલાકાત બાદ માત્ર સ્ટાફ જ નહીં, પણ કોર્પોરેટરોમાં પણ ભારે ચર્ચા જાગી છે. જે સ્ટાફ બપોરનું ભોજન લેવા નિરાંતે ઘરે જતો રહેતો હતો, તેઓ હવે ઓફિસ છોડતા ડરી રહ્યા છે. રાજ્ય સરકારે ગત એપ્રિલમાં અરુણ મહેશ બાબુને વડોદરાના મ્યુનિસિપલ કમિશનર બનાવ્યા હતા. વડોદરાના વિકાસમાં નેતાગીરી અને કોર્પોરેશન પર સવાલો ઉભા થતા રહ્યા છે, ત્યારે કમિશનરના આ તેજતર્રાર અંદાજે સરકારી નોકરીને મજાક સમજી બેઠેલા બાબુઓનો પરસેવો પાડી દીધો છે. ગાંધીનગરથી લીલી ઝંડી મળ્યા બાદ જ તેમણે કોઈ પણ સ્થાનિક પદાધિકારીને સાથે રાખ્યા વગર આ કડક નિરીક્ષણ કર્યું હોવાની ચર્ચા છે.
૨૦૧૩ બેચના આઈએએસ (IAS) અધિકારી અરુણ મહેશ બાબુ મૂળ કેરળના ‘કાશ્મીર’ કહેવાતા મુન્નારના વતની છે. છ ભાષાઓ બોલી શકતા અરુણ મહેશ બાબુ વિશ્વામિત્રી રિવર પ્રોજેક્ટ પર કામ કર્યા બાદ હવે એક્શન મોડમાં આવી ગયા છે. મુખ્યમંત્રી ભૂપેન્દ્ર પટેલ દ્વારા પ્રોજેક્ટ્સ સમયસર પૂરા કરવાના નિર્દેશ બાદ તેમનો આ કડક મિજાજ સામે આવ્યો છે. સ્વચ્છતા સર્વેક્ષણમાં પાછળ ધકેલાયેલા વડોદરાને ફરી ટોચ પર લાવવા તેઓ સફાઈ, તૂટેલા રસ્તાઓ અને દબાણો હટાવવા પર ધ્યાન આપી રહ્યા છે. B.Tech બાદ MBA કરનાર અરુણ મહેશ બાબુ અગાઉ રાજકોટના કલેક્ટર રહી ચૂક્યા છે. હવે તેમના પર ૧૯ વોર્ડમાં ફેલાયેલી વડોદરા મહાનગરપાલિકાનું કામકાજ સુધારવાનો અને લોકોને સારી સુવિધાઓ આપવાનો પડકાર છે. કમિશનર તરીકે નવ મહિના પૂર્ણ થયા બાદ હવે તેમના પર કામનું રિઝલ્ટ આપવાનું દબાણ છે.
