એક દુર્લભ કિસ્સામાં, અમેરિકન સ્પેસ સ્ટેશન નાસા મેડિકલ ઈમરજન્સીને કારણે પહેલીવાર અવકાશયાત્રીઓને પૃથ્વી પર પાછા લાવવા જઈ રહ્યું છે. અવકાશયાત્રીની સ્વાસ્થ્યની સમસ્યાને કારણે નાસાએ તાજેતરમાં આંતરરાષ્ટ્રીય સ્પેસ સ્ટેશન પરના તેના મિશનની અવધિ ટૂંકી કરી છે. નાસાએ ગુરુવારે જણાવ્યું હતું કે અમેરિકા, જાપાન અને રશિયાની ચાર સભ્યોની ટીમ યોજના કરતા થોડા દિવસો પહેલા પૃથ્વી પર પરત ફરશે.
નાસાએ કહ્યું છે કે અવકાશયાત્રીની સ્વાસ્થ્ય સમસ્યાને કારણે નાસાએ આ વર્ષની તેની પ્રથમ ‘સ્પેસવોક’ રદ કરી છે. અવકાશ એજન્સીએ ગોપનીયતાને ટાંકીને અવકાશયાત્રી અથવા તેની સ્વાસ્થ્યની સ્થિતિ જાહેર કરી નથી. જોકે, તેમાં કહેવામાં આવ્યું છે કે ક્રૂ મેમ્બરની હાલત હવે સ્થિર છે.
નાસાના મુખ્ય આરોગ્ય અને તબીબી અધિકારી ડો. જેમ્સ પોલ્કે જણાવ્યું હતું કે, નાસાના અધિકારીઓએ અહેવાલ આપ્યો હતો કે સ્પેસ સ્ટેશન પર કોઈ કટોકટી ન હતી, પરંતુ તેઓ ક્રૂ સભ્યોને બચાવવા માટે સાવચેતી રાખી રહ્યા હતા. પોલ્કે જણાવ્યું હતું કે સ્પેસ સ્ટેશનથી નાસાનું આ પ્રથમ તબીબી સ્થળાંતર મિશન છે.
નોંધનીય છે કે ચાર સભ્યોની ટીમ ઓગસ્ટમાં સ્પેસએક્સ દ્વારા પૃથ્વીની પરિક્રમા કરતી પ્રયોગશાળામાં પહોંચી હતી અને ઓછામાં ઓછા છ મહિના સુધી સ્પેસ સ્ટેશન પર રહેવાની હતી. આ ટીમમાં જાપાનના કિમિયા યુઈ અને રશિયાના ઓલેગ પ્લેટોનોની સાથે નાસાના જેન્ના કાર્ડમેન અને માઈક ફિન્કે પણ સામેલ હતા.
